Өскемен қаласының тергеу соты «НемолчиKZ» қорының президенті Дина Смаилованы (Таңсәрі) қамауға алу туралы үкім шығарды. Бұл туралы Шығыс Қазақстан облысының прокуратурасы айтты, деп хабарлайды «Адырна» тілшісі.
16 қазанда Өскемен полиция басқармасы құқық қорғаушыға қатысты алаяқтық фактісі бойынша сотқа дейінгі тергеуді бастаған болатын.
«2023 жылдың 28 желтоқсанында Өскемен қаласының мамандандырылған тергеу соты Д.Б.Смаиловаға қатысты оны ұстаған сәттен бастап 2 ай мерзімге "қамауда ұстау" түріндегі бұлтартпау шарасына санкция берді»,—делінген ведомствоның баспасөз қызметінің хабарламасында.
Дина Таңсәрінің адвокаты Гүлнара Жуаспаева шешімге шағым түсіретінін айтты.
Айта кетейік, бұған дейін Дина Таңсәріге алты қылмыстық іс қозғалып, оның екеуі "Алаяқтық" бабы бойынша тергеліп жатқаны белгілі болған еді.
