Көкшетауда бір жарым жасар бала 4 қабаттың терезесінен құлап кетті, деп хабарлайды "Адырна" порталы.
Оқиға туралы полицияға облыстық көпсалалы балалар ауруханасының жедел жәрдем бөлімінің медбикесі хабарлаған.
"Бала 4 қабаттың терезесінен құлап кеткен. Бұл кезде анасы ас үйде ыдыс-аяқ жуып жатқан, әкесі ұйықтап жатқан. Өтіп бара жатқан адамдардың айғайлаған дауысын естіп төменге түсіп, құлап жатқан балаларын көрген. Ата-анасы баланы өз күштерімен балалар ауруханасының жедел жәрдем бөліміне жеткізді", – делінген Ақмола облысының полиция департаментінің хабарламасында.
Бала қазір комада жатыр. Алдын ала болжам бойынша, баланың бас сүйегі ауыр жарақат алған, миы қатты зақымданған және бас сүйегі сынған.
