Ютубтағы "ORDA LIFE" арнасында ҚР мәжіліс депутаты Айдос Сарымның сұхбаты жарияланды. Сұхбатта депутат алдағы уақыттағы геосаяси жағдай, саяси мәдениет, елдегі жаңа сайлау мәдениетін қалыптастыру, "Астана" атауы сынды тақырыптарда сөз қозғайды, деп хабарлайды "Адырна" ұлттық порталы. Журналистің қойған сұрағына Айдос Сарым:
- Алдағы он жылымыз артта қалған отыз жылдығымыздан қиын болуы ықтимал, - деп жауап қатады.
Сұхбатта елорданың "Астана" атануына, Президент сайлау мерзіміне қатысты айтылатын тұстар бар.
"Жеті жылдықты бір сәтте қабылдап тастадыңыздар. Тоқаев биліктен кеткеннен кейін 7 жылдықты алып тастап, конституцияға тағы өзгеріс енгізесіздер ме? Бұл сіздер секілді қуыршақ депутаттар тұрғанда түк те емес" деген журналист тарапынан қойылған сұрақ желісі Айдос Сарымның ашуын туғызды. Сауалға депутат:
- Кешіріңіз, сөзіңізді байқап сөйлеңіз. Мен қуыршақ депутат емеспін. Қайта сіз қуыршақ баспасөз шығарсыз, - деп жауап қатқан.
Естеріңізге сала кетейік, жақында депутаттар бұрын бірауыздан өзгертілген Елордамызға "Астана" атауын қайтару мен Президенттік сайлау мерзімін өзгертуді бір ауыздан қабылдаған еді.
"Адырна" ұлттық порталы
