Нұр-Сұлтанда биыл 533 адамнан энтеровирустық инфекция табылды, деп жазады "Адырна" ұлттық порталы.
Мамандар дабыл қақса да, бұған түбейгейлі тосқауыл қою мүмкін болмай тұр. Тұрғындар сергіп қалу үшін субұрқақ жағалауда. Әсіресе балалар онда суға түсіп, шомылып жүр. Алайда оның салдарына мән беріп, зардабына үңілген ешкім жоқ. Тіпті субұрқақтағы сауық-сайранның арты ауыр сырқатқа әкеп соғуы мүмкін.
Жаз басталғалы санитарлы-эпидемиологиялық бақылау департаменті субұрқақтарындағы судың сапасын тексеруде. Мамыр айынан бері 240 сынама алынды. Оның 18-інен санитарлы-микробиологиялық көрсеткіштердің талапқа сай еместігі анықталды. Онда тұмаудан бастап жұқпалы ауруға душар болу қаупі бар.
Жұқпалы ауру жұқтырудан бөлек, субұрқақта тоққа түсу қаупі бар. Десе де, онда шомылуға тыйым салынбаған.
"Адырна" ұлттық порталы
