بيىل «Nur Otan» پارتياسى اقتوبە وبلىستىق پارتياسى جانىنان جاستاردى قولداۋ جونىندەگى وڭىرلىك قوعامدىق كەڭەس قۇرىلعان بولاتىن. قازىر بۇل كەڭەس وبلىستا جاستاردى قولداۋعا باعىتتالعان مەملەكەتتىك باعدارلامالاردىڭ ىسكە اسىرىلۋىن، جاس وتباسىلاردىڭ تۇرعىن ءۇي پروبلەمالارىنىڭ شەشىلۋىن، جاستار كاسىپكەرلىگىن دامىتۋ جانە ولاردى جۇمىسقا ورنالاستىرۋ ماسەلەلەرىن قاداعالاپ، قارقىندى جۇمىستار جۇرگىزۋدە. وسى ورايدا ءبىز اتالعان قوعامدىق كەڭەستىڭ توراعاسى باقىت مولداگەرەەۆامەن اڭگىمەلەسكەن ەدىك.
— جاستاردى قولداۋ جونىندەگى وڭىرلىك قوعامدىق كەڭەستىڭ مىندەتتەرى تۋرالى ايتىپ بەرسەڭىز.
— بيىلعى جىلدىڭ باسىندا وتكەن ەلىمىزدەگى ۇلكەن ساياسي ناۋقاننان كەيىن «Nur Otan» پارتياسى حالىق الدىندا بەرگەن ۋادەسىن ورىنداۋعا بەلدىم بەكەم بۋدى. «وزگەرىستەر جولى: ءار ازاماتقا لايىقتى ءومىر» اتتى سايلاۋالدى باعدارلاماسىنداعى 2025 جىلعا دەيىنگى مەجەلەنگەن مىندەتتەرىنىڭ ورىندالۋى بارىسىن پارتيا بۇگىندە قاتاڭ قاداعالاۋدى مىقتاپ قولعا الدى. وسى ماقساتتا پارتيا جانىنان ءتۇرلى باعىتتار بويىنشا قوعامدىق كەڭەستەر قۇرىلىپ، ولاردىڭ قۇزىرەتتىلىكتەرىن ارتتىردى. ولاردىڭ قاتارىندا جاستاردى قولداۋ جونىندەگى قوعامدىق كەڭەس تە بار.
مۇنداي كەڭەس پارتيا جانىنان رەسپۋبليكالىق جانە پارتيانىڭ ايماقتىق، اۋداندىق فيليالدارى جانىنان قۇرىلدى. مەن سول پارتيانىڭ اقتوبە وبلىستىق فيليالى جانىنداعى جاستاردى قولداۋ جونىندەگى ايماقتىق كەڭەسىنىڭ توراعالىعىنا سايلاندىم. ايتا كەتۋ كەرەك، بۇل — قوعامدىق جۇمىس. كەڭەستىڭ بىردە-ءبىر مۇشەسى پارتيانىڭ تاراپىنان جالاقى المايدى. ياعني، ايماقتىق كەڭەستىڭ 15 مۇشەسى بولسا، ولاردى بارلىعىنىڭ دا بەلگىلى جۇمىس ورنى بار، ولار كەڭەستىڭ جۇمىسىن قوعامدىق نەگىزدە الىپ ءجۇر. سەبەبى ولار — ەلدىڭ، ودان قالدى ءوڭىر مەن اۋدانداردىڭ دامۋىنا، حالىقتى الاڭداتقان ماسەلەلەردى وسىنداي مۇمكىندىكتىڭ ناتيجەسىندە تۇيتكىلدەردىڭ شەشىمىن تابۋعا ناقتى ءىس جۇزىندە اتسالىسۋعا مۇددەلى ازاماتتار.
كەڭەستىڭ نەگىزگى مىندەتتەرى — پارتيانىڭ سايلاۋالدى باعدارلاماسىنىڭ ىسكە اسىرىلۋى مەن مونيتورينگىن قامتاماسىز ەتىپ، مەملەكەتتىك جاستار ساياساتى ماسەلەلەرى جونىندەگى زاڭنامانى جەتىلدىرۋگە، جاستاردىڭ قۇقىقتارى مەن زاڭدى مۇددەلەرىن قورعاۋدى قامتاماسىز ەتۋگە ىقپال ەتۋ. سونىمەن قاتار، جاستار ساياساتى سالاسىنا قاتىستى وزگە دە ماسەلەلەردى تالقىلاپ، جاستارعا باعىتتالعان مەملەكەتتىك باعدارلامالار مەن جوبالاردىڭ ىسكە اسىرىلۋ تيىمدىلىگىنە تالداۋ جۇرگىزەدى. وسى باعىتتا قوعامدىق كەڭەس كوشپەلى نەمەسە ونلاين رەجيمدە ازاماتتاردى قابىلداۋ وتكىزەدى.
جالپى پارتيانىڭ باعدارلاماسىنداعى ناقتى مىندەتتەردى ورىنداۋ ماقساتىندا ارنايى ءوڭىردىڭ جول كارتاسى ازىرلەندى. وڭىرگە قاتىستى وزەكتى ماسەلەلەر كەزەڭ-كەزەڭگە ءبولىنىپ، شەشىمى تاباتىن مەرزىمدەرى بەلگىلەندى.
— پارتيانىڭ جاستاردى قولداۋعا ارنالعان ارنايى باعدارلاماسى بار ما؟
— ارينە، بار. ول 2025 جىلعا دەيىنگى مەرزىمگە ارنالعان. «جاستار — وتانعا!» دەپ اتالادى.
اتالعان باعدارلاماداعى جانە «وزگەرىستەر جولى: ءار ازاماتقا لايىقتى ءومىر!» اتتى سايلاۋالدى باعدارلاماسىنداعى الداعى بەس جىلدىققا مەجەلەنگەن مىندەتتەرىن ءتيىمدى ىسكە اسىرۋ ماقساتىندا ءوڭىر جاستارىنا ارنالعان جول كارتاسى دا ازىرلەندى.
جاستاردى قولداۋ جونىندەگى ايماقتىق قوعامدىق كەڭەس وسى مىندەتتەردىڭ ورىندالۋىن قاداعالايتىن كونسۋلتاتيۆتىك-كەڭەسشى ورگان رەتىندە مۇنىڭ بارلىعىن قاداعالاپ، جەرگىلىكتى اتقارۋشى بيلىكتەن ورىندالۋىن باقىلاپ وتىرادى. ورتالىق مەملەكەتتىك ورگاندار، جەرگىلىكتى اتقارۋشى ورگاندار مەن ۇيىمدار باسشىلارىنىڭ كەڭەس قىزمەتىنىڭ باعىتتارى شەڭبەرىندە پارتيانىڭ سايلاۋالدى باعدارلاماسىن جانە «جاستار – وتانعا!» باعدارلاماسىن ىسكە اسىرۋ ماسەلەلەرى بويىنشا ەسەبىن تىڭدايدى. ۇسىنىمدار ازىرلەۋ ءۇشىن كەڭەس پەن پارتيانىڭ ايماقتىق فيليالدارى جانىنداعى جاستاردى قولداۋ جونىندەگى وڭىرلىك قوعامدىق كەڭەستەر مۇشەلەرىنىڭ ۇسىنىستارىن قارايدى. پارتيانىڭ ايماقتىق فيليالدارى جانىنداعى جاستاردى قولداۋ بويىنشا وڭىرلىك قوعامدىق كەڭەستەردىڭ قىزمەتىن ۇيلەستىرەدى. جۇمىس توپتارىنىڭ قىزمەتىن ۇيىمداستىرىپ، جاستار وكىلدەرى تاراپىنان تۇسكەن وتىنىشتەر مەن شاعىمداردى قارايدى. پارلامەنت ماجىلىسىندەگى جانە ماسليحاتتارداعى پارتيا فراكتسيالارىمەن، پارتيالىق باقىلاۋ كوميتەتىمەن، مۇددەلى مەملەكەتتىك ورگاندارمەن، بۇقارالىق اقپارات قۇرالدارىمەن، قوعامدىق جانە ۇكىمەتتىك ەمەس بىرلەستىكتەرمەن، جاستار ساياساتى سالاسىنداعى ساراپشىلارمەن جانە وزگە دە زاڭدى جانە جەكە تۇلعالارمەن ءوزارا ءىس-قيمىل جاسايدى.
— قوعامدىق كەڭەستىڭ جۇمىس بارىسى تۋرالى ايتساڭىز. قازىرگى تاڭدا وڭىردە جاستارعا قاتىستى قانداي ماسەلەلەردىڭ شەشىلۋىنە اتسالىسىپ جاتىرسىزدار؟
— جىل باسىنان بەرى جاستاردى قولداۋ جونىندەگى وڭىرلىك قوعامدىق كەڭەستىڭ ەكى وتىرىسى ءوتتى. ءبىرىنشى وتىرىسىندا كەڭەس مۇشەلەرىنە كەڭەستىڭ نەگىزگى مىندەتتەرى، فۋنكتسيالارى مەن قۇرامى تانىستىرىلدى. جىلدىق جۇمىس جوسپارى تالقىلانىپ، 2025 جىلعا دەيىنگى «جاستار-وتانعا!» باعدارلاماسىن ىسكە اسىرۋ بويىنشا ازىرلەنگەن جول كارتاسىنداعى بەس باعىتقا كەڭەس مۇشەلەرى بەكىتىلدى.
ەكىنشى وتىرىستىڭ كۇن تارتىبىندە جۇمىس ىستەيتىن جاستار ءۇشىن جالعا بەرىلەتىن تۇرعىن ءۇي مەملەكەتتىك باعدارلاماسىن ىسكە اسىرۋ بارىسى جانە جاس وتباسىلاردىڭ تۇرعىن ءۇي پروبلەمالارىن شەشۋ جونىندەگى وڭىرلىك باعدارلامالارىن قۇرۋ ماسەلەسى قارالدى.
ودان بولەك، بەكىتىلگەن جۇمىس جوسپارىنا سايكەس، اقتوبە قالاسىنداعى ونعا جۋىق جوعارى وقۋ ورنى مەن كوللەدجدىڭ جانىنداعى ستۋدەنتتەرگە ارنالعان جاتاقحانالاردىڭ تۇرمىس-تىرشىلىگىنە مونيتورينگ جۇرگىزدى.
پارتيانىڭ وتباسى، ايەلدەر ماسەلەلەرى جانە بالالاردىڭ قۇقىقتارىن قورعاۋ جونىندەگى ايماقتىق قوعامدىق كەڭەسىنىڭ مۇشەلەرىمەن جانە «Jas Otan» جاستار قاناتىنىڭ اقتوبە وبلىستىق فيليالىمەن بىرلەسىپ، بالالار قاۋىپسىزدىگىن قامتاماسىز ەتۋ ماقساتىندا قالاداعى جانە اۋدان ورتالىقتارىنداعى اشىق قۇدىقتاردى، جارىقتاندىرىلماعان كوشەلەردى ماسەلەسىن جانە جول قوزعالىس قاۋىپسىزدىگىن انىقتاۋ باعىتىندا مونيتورينگ جۇرگىزىلدى. جالپى «Jas Otan» جاستار قاناتىنىڭ اقتوبە وبلىستىق فيليالىمەن قويان- قولتىق كوپتەگەن ىزگىلىكتى ىستەر اتقارىپ كەلەمىز. ماسەلەن، ءبىز بيىل بىرنەشە مارتە اۋداندارعا جۇمىس ساپارمەن شىعىپ، شالقار، تەمىر، العا اۋداندارىن ارالاپ، اۋداندىق قوعامدىق كەڭەستەردىڭ وتىرىستارىنا قاتىستىق. اۋدان جاستارىن الاڭداتقان ماسەلەلەردى تالقىلادىق.
الدا جىل سوڭىنا دەيىن ءبىز كەڭەس وتىرىستارىندا جاستار اراسىنداعى قىلمىستى ازايتۋ بويىنشا جانە جاستاردىڭ دەنساۋلىعىن جاقسارتۋ بويىنشا قابىلدانىپ جاتقان كەشەندى شارالاردىڭ ورىندالۋى سىندى كوپتەگەن وزەكتى ماسەلەلەردى قارايمىز. سونداي-اق كەمىندە 20 ستۋدەنتتىك جاتاقحانانىڭ الەۋمەتتىك-تۇرمىستىق جاعدايلارىن مونيتورينگىلەۋ، NEET ساناتىنداعى جاستاردىڭ دەرەكتەر بازاسىن قۇرۋمەن اتاۋلى جۇمىس جۇرگىزۋ سىندى ىستەر اتقاراتىن بولامىز. جالپى ايتقاندا الداعى ۋاقىتتا ءبىز جاستاردىڭ يگىلىگى ءۇشىن جۇمىس ىستەيمىز.
— اڭگىمەڭىزگە راحمەت!
اڭگىمەلەسكەن داناگۇل بايمۇقاش،
«ادىرنا» ۇلتتىق پورتالى.
