اقمولا وبلىسىندا 10 ساۋىردەن باستاپ رەسپۋبليكالىق «ءجاسوسپىرىم» جەدەل-الدىن الۋ ءىس-شاراسى وتكىزىلىپ جاتىر. بۇل تۋرالى اقمولا وبلىستىق پوليتسيا دەپارتامەنتى باستىعىنىڭ ورىنباسارى، پوليتسيا پولكوۆنيگى اسلان قىزبيكەنوۆ بريفينگ بارىسىندا ءمالىم ەتتى، دەپ حابارلايدى وڭىرلىك كوممۋنيكاتسيالار قىزمەتىنەن.
بۇل اكتسيانىڭ ماقساتى – كامەلەتكە تولماعاندار اراسىنداعى قۇقىقبۇزۋشىلىقتىڭ الدىن الۋ، ولاردىڭ قاۋىپسىزدىگىن قامتاماسىز ەتۋ. ءبىر اپتا ىشىندە پوليتسيا بولىمدەرىنە 373 ءجاسوسپىرىم جەتكىزىلگەن. ولاردىڭ باسىم بولىگى ساعات 23:00-دەن كەيىن اتا-اناسىز كوشەدە ءجۇرۋى سەبەپتى ۇستالعان. اقمولا وبلىستىق پوليتسيا دەپارتامەنتى باستىعىنىڭ ورىنباسارى، پوليتسيا پولكوۆنيگى اسلان
قىزبيكەنوۆتىڭ ايتۋىنشا، جاسوسپىرىمدەر ءۇشىن ەڭ قاۋىپتى كەزەڭ – تۇنگى ۋاقىت، سوندىقتان رەيدتەر وسى مەزگىلگە ەرەكشە نازار اۋدارۋمەن جۇرگىزىلەدى.
«كامەلەتكە تولماعانداردىڭ تۇنگى ۋاقىتتا قوعامدىق ورىنداردا اتا-اناسىز ءجۇرۋى ءجيى كەزدەسەدى. ءدال وسى ۋاقىتتا ولار قىلمىستىڭ قۇربانى نەمەسە قاتىسۋشىسى بولۋى مۇمكىن»، – دەيدى قىزبيكەنوۆ.
رەيدتەرگە 380 پوليتسيا قىزمەتكەرى جانە 120-دان استام جەرگىلىكتى اتقارۋشى ورگانداردىڭ، ءبىلىم بەرۋ، دەنساۋلىق ساقتاۋ سالالارى مەن ۇەۇ وكىلدەرى تارتىلعان. ناتيجەسىندە 315 ءجاسوسپىرىمنىڭ ەرەسەكتەردىڭ قاراۋىنسىز قوعامدىق ورىنداردا جۇرگەنى انىقتالدى. 31 بالا ۇساق بۇزاقىلىق ءۇشىن جاۋاپقا تارتىلدى. 21 ءجاسوسپىرىم ىشىمدىك ىشكەنى ءۇشىن جازالاندى. 1 بۋللينگ فاكتىسى تىركەلدى. 5 بالا تىيىم سالىنعان زاتتاردى (پىشاق سەكىلدى) زاڭسىز الىپ جۇرگەنى ءۇشىن ۇستالدى.
سونىمەن قاتار، قۇقىق قورعاۋ ورگاندارى باسقا جاسوسپىرىمدەردى زاڭسىز ارەكەتتەرگە يتەرمەلەيتىن "بەيرەسمي كوشباسشىلاردى" انىقتاۋدا. 12 وسىنداي جاسوسپىرىمگە قاتىستى اقپارات ءتيىستى قىزمەتتەرگە جىبەرىلىپ، پروفيلاكتيكالىق جۇمىستار جۇرگىزىلۋدە.
ءىس-شارا اياسىندا جاعدايى تومەن وتباسىلار دا نازاردان تىس قالمادى. بالالارىن تاربيەلەۋ مىندەتتەرىن ورىنداماعانى ءۇشىن 43 اتا-اناعا اكىمشىلىك حاتتاما تولتىرىلدى. سونىمەن قاتار، 30 اتا-انا مەن 41 ءجاسوسپىرىم پروفيلاكتيكالىق ەسەپكە الىندى.
مەكتەپتەردە ءتۇسىندىرۋ جۇمىستارى كۇشەيتىلدى. 454 ءدارىس،21 بريفينگ ۇيىمداستىرىلدى. سونداي-اق مەكتەپتەر ماڭىنداعى جول قاۋىپسىزدىگى تەكسەرىلىپ، 140 كەمشىلىك بويىنشا ءتيىستى مەكەمەلەرگە نۇسقاما بەرىلدى.
ينتەرنەتتەگى قاۋىپتەر دە نازاردا. پوليتسيا قىزمەتكەرلەرى تاراپىنان 116 قاۋىپتى ينتەرنەت-رەسۋرس انىقتالىپ، ولار بالالاردىڭ ءومىرى مەن دەنساۋلىعىنا قاۋىپ توندىرەتىنى بەلگىلى بولدى.
ساۋدا ورىندارىندا دا زاڭ بۇزۋشىلىقتار تىركەلدى. 21 جاسقا تولماعاندارعا تەمەكى ساتۋ بويىنشا 7,زاڭسىز الكوگول ساتۋ بويىنشا 4 دەرەك، كامەلەتكە تولماعانداردىڭ ويىن-ساۋىق ورىندارىندا ءجۇرۋى بويىنشا 3 قۇقىقبۇزۋشىلىق انىقتالدى.
اسلان قىزبيكەنوۆتىڭ ايتۋىنشا، «ءجاسوسپىرىم» ءىس-شاراسى – جاي عانا اكتسيا ەمەس، بالالار ءۇشىن قاۋىپسىز ورتا قالىپتاستىرۋعا باعىتتالعان جۇيەلى جۇمىستىڭ ءبىر بولىگى.
«جاسوسپىرىمدەر بوس جۇرمەي، سپورتپەن، شىعارماشىلىقپەن اينالىسۋى كەرەك. ولاردى ەڭبەككە باۋلىپ، ۆولونتەرلىك جۇمىسقا تارتۋ – ماڭىزدى قادام»، – دەپ تۇيىندەدى پوليتسيا وكىلى.
وپم «ءجاسوسپىرىم» شاراسى اقمولا وبلىسىندا جالعاسۋدا. پوليتسيا بارلىق تۇرعىنداردى بالالاردىڭ قاۋىپسىزدىگىن قامتاماسىز ەتۋ ىسىندە بىرلەسە ارەكەت ەتۋگە شاقىرادى.
