قازاقستاندىق رەجيسسەر ەلزات ەسكەندىردىڭ «ءابىل» ءفيلمى 31-Vesoul حالىقارالىق ازيا كينوفەستيۆالىن (فرانتسيا) جەڭىسپەن اياقتادى.
تۋىندى Jury Grand Prize (قازىلار القاسىنىڭ باس جۇلدەسى), Critical Jury Prize (كينوسىنشىلار القاسىنىڭ جۇلدەسى) جانە NETPAC Jury Prize (NETPAC قازىلار القاسىنىڭ جۇلدەسى) ماراپاتتارىنا يە بولدى.
كورەرمەندەر مەن قازىلار القاسى ەلزات ەسكەندىردىڭ دەبيۋتتىك ءفيلمىن جوعارى باعالادى.
ء“ابىل” ءفيلمى - سوۆەت وداعى قۇلاپ، كولحوز-سوۆحوز تاراپ، مال-مۇلىك بولىسكە ءتۇسىپ، ەلدە پريۆاتيزاتسيا ورىن العان كەزەڭدەگى قياناتقا ۇشىراعان قاراپايىم ادامدار مەن قاراۋسىز قالعان قازاق اۋىلىنداعى بەيبەرەكەتسىزدىكتى سۋرەتتەيدى. سول ارقىلى، كينوتۋىندى تاۋەلسىزدىك باسىنداعى كۇردەلى ۋاقىت اياسىنداعى قازاق حالقىنىڭ رۋحاني كەيپىنە، پسيحولوگيالىق كۇيىنە الەۋمەتتىك تالداۋ جاسايدى. فيلمدە سوۆەتتىك جۇيە كەزىندەگى ادام ءومىرىنىڭ قۇنسىزدىعى، قازاق حالقىنىڭ باستان كەشكەن جاعدايى، تۇرمىس قالپى، ءوز ەلىندە، ءوز جەرىندە ديسكريميناتسياعا تۇسكەندىگى، سوتسياليزمنەن كاپيتاليزمگە اۋىسۋ تۇسىنداعى ەكىۇداي سەزىم، سونىمەن قاتار جەمقورلىقتىڭ پايدا بولۋى جايلى دا وي قوزعايدى.
فيلم ۇلكەن تاريحي وقيعالار كەزىندەگى قاراپايىم ادامداردىڭ تاعدىرىن سۋرەتتەۋدى ماقسات تۇتقان.
بيىلعى جىلعى فەستيۆالدىڭ قازىلار القاسىنىڭ توراعاسى بۇگىنگى تاڭداعى الەمدىك كينونىڭ ەڭ ىقپالدى رەجيسسەرلەرىنىڭ ءبىرى، قىتايلىق تسزيا چجانكە بولدى. ونىڭ "پلاتفورما", "بەلگىسىز راحات", "الەم", “كۇناعا بىلعانۋ” جانە "رومانتيك بۋىن" سياقتى تۋىندىلارى حالىقارالىق ۇزدىك كينوفەستيۆالدەردە جوعارعى ماراپاتتار مەن باعاعا يە بولىپ، ال 2006 جىلى"ناتيۋرمورت” كينوتۋىندىسى ءۇشىن ۆەنەتسيا كينوفەستيۆالىنىڭ “التىن ارىستان” باس جۇلدەسىن جەڭىپ العان. تسزيا چجانكە شەبەرلىگىنىڭ باستى ەرەكشەلىگى قىتايدىڭ الەۋمەتتىك بەت-بەينەسىن نازىك تۇردە زەردەلەي سۋرەتتەۋىمەن ەرەكشەلەنەدى.
Vesoul حالىقارالىق ازيا كينوفەستيۆالى - ازيا كينوسىنا ارنالعان ەڭ كونە جانە ەڭ ءىرى ەۋروپالىق فەستيۆالدەردىڭ ءبىرى. 1995 جىلى نەگىزى قالانعان فەستيۆال جىل سايىن ازيانىڭ جۇزدەگەن فيلمدەرىن فرانتسيا كورەرمەندەرىنە ۇسىنۋ ارقىلى ولارعا جاس ەسىمدەردى تانىتىپ جانە اۆتورلىق كينەماتوگرافياعا ۇلكەن قولداۋ كورسەتەدى. فەستيۆال جاس رەجيسسەرلەرگە باعىتتالعاندىعىمەن تانىمال ءارى ونىڭ جۇلدەلەرى فيلمدەردىڭ حالىقارالىق دەڭگەيدە تانىلۋىنا جانە فيلمدەردىڭ اۋديتورياسىن ودان ارى كەڭەيتۋگە كومەكتەسەدى.
وسى جىلدار ىشىندە اپيچاتپونگ ۆەراسەتحاكۋل، لاۆ دياس، دجافار پاناحي سياقتى كورنەكتى رەجيسسەرلەر فەستيۆال لاۋرەاتتارى اتاندى. باعدارلامادا تەك كونكۋرستىق كورسەتىلىمدەر عانا ەمەس، سونىمەن قاتار رەتروسپەكتيۆالار، تاقىرىپتىق سەكتسيالار، كينەماتوگرافيستەرمەن پىكىر الماسۋ جانە شىعىس پەن باتىس اراسىنداعى ديالوگتى ناسيحاتتايتىن دوڭگەلەك ۇستەلدەر وتەدى.
فرانتسۋز پرەمەراسىندا ءفيلمدى رەجيسسەر ەلزات ەسكەندىر مەن اكتەر ەرلان تولەۋتاي تانىستىردى.
الەمدىك پرەمەراسى 29-پۋسان حالىقارالىق كينوفەستيۆالىندە وتكەن «ءابىل» ءفيلمىنىڭ فەستيۆالدىك ساپارى گونكونگ حالىقارالىق ازيا كينوفەستيۆالى، سكانديناۆيا ءوڭىرىنىڭ باس كينوفەستيۆالى 48-گەتەبورگ حالىقارالىق كينوفەستيۆالدەرىنە قاتىسۋمەن جالعاسىپ، حالىقارالىق اۋديتوريانىڭ ۇلكەن قىزىعۋشىلىعىن تۋدىرۋدا. سونىمەن قاتار، الداعى ۋاقىتتا دا بىرنەشە بىرنەشە حالىقارالىق كينو الاڭدارىنا شاقىرتۋ العان.
