الماتى حالىقارالىق اۋەجايى قىتاي تىلىندە دە قىزمەت كورسەتە باستادى. بۇل تۋرالى ەكوجۋرناليست، ساياحاتشى ءمادينا ءاشيلوۆا Facebook جەلىسىندەگى پاراقشاسىندا ايتتى، دەپ حابارلايدى «ادىرنا» ءتىلشىسى. ازىرگە رەسمي مالىمەت بەرىلمەدى.
«ىشكى رەيستەر تابلوسى قىتايشا جازىلعان با؟ راس پا؟ ءبىر ساتتە قىتايدا ءجۇرمىن بە دەپ ويلانىپ قالدىم. تابلوعا قاراي جاقىنداسام، اقپارات قىتاي تىلىندە كورسەتىلگەن. بىردەن ابدىراپ قالدىم. بىراق الماتىدا ەكەنىمدى ەسكە ءتۇسىرىپ، ەسىمدى جيدىم»،—دەدى ول.
ەسكە سالايىق، وتكەن جىلدىڭ شىلدە ايىندا پرەزيدەنت قاسىم-جومارت توقاەۆ پەن قىتاي حالىق رەسپۋبليكاسىنىڭ توراعاسى سي تسزينپين 2025 جىلى قازاقستاندا قىتاي ءتۋريزمى جىلىن وتكىزۋ تۋرالى شەشىم قابىلدادى. وسىعان بايلانىستى كولىك مينيسترلىگى اۋەجايلار مەن ۆوكزالدارداعى تۋريستىك باعىتتار تۋرالى بروشيۋرالاردا قىتاي تىلىندە اقپاراتتىڭ بولۋىن قامتاماسىز ەتۋ تاپسىرىلعانىن مالىمدەدى. سونداي-اق مينيستر مارات قاراباەۆ تۋريستەردى تىركەۋ ءۇشىن قوسىمشا ەسەپتەگىشتەر ورناتۋ جانە ءىرى اۋەجايلار مەن ۆوكزالدارعا قىتاي ءتىلىن بىلەتىن قوسىمشا مامانداردى تارتۋ جۇمىستارى جۇرگىزىلەتىنىن اتاپ ءوتتى.
الماتى اۋەجايىندا رەيستەر تابلوسىن قىتاي تىلىندە ۇسىنۋ باستاماسىن 2015 جىلى بۇرىنعى قالالىق تۋريزم باقارماسىنىڭ باسشىسى تيمۋر دۇيسەنعاليەۆ كوتەرگەن ەدى.
