رەسەي اسكەرى جەكسەنبىگە قاراعان ءتۇنى ۋكرايناعا قارسى تاعى ءبىر جاپپاي دروندىق شابۋىل جاسادى، دەپ حابارلايدى "ادىرنا" ۇلتتىق پورتالى. بۇل تۋرالى ۋكراينا قارۋلى كۇشتەرىنىڭ اۋە كۇشتەرى مالىمدەدى.
ولاردىڭ ايتۋىنشا، ءتۇن ىشىندە ۋكرايناعا جالپى سانى 103 Shahed ۇشقىشسىز ۇشاعى مەن باسقا دا تۇردەگى دروندار جىبەرىلگەن. ۋكراينانىڭ اۋە شابۋىلىنا قارسى قورعانىسى پولتاۆا، سۋمى، حاركوۆ، كيەۆ، چەرنيگوۆ، چەركاسسى، كيروۆوگراد، جيتومير، دنەپروپەتروۆسك، حەرسون، نيكولاەۆ جانە زاپوروجە وبلىستارىندا 52 دروندى اتىپ تۇسىرگەن.
ۋكراينا قارۋلى كۇشتەرىنىڭ مالىمەتى بويىنشا، تاعى 44 درون باعىتىن وزگەرتىپ، جەرگە زاقىم كەلتىرمەگەن. ءبىر درون بەلارۋسقا قاراي ۇشىپ كەتكەن. سونىمەن قاتار، حەرسون باعىتىنا قىرىمنان "يسكاندەر-م" بالليستيكالىق زىمىرانى ۇشىرىلعانى تىركەلدى.
ۋكراينا قارۋلى كۇشتەرىنىڭ مالىمەتىنشە، رەسەي شابۋىلى سالدارىنان حەرسون، نيكولاەۆ، چەرنيگوۆ، سۋمى، جيتومير جانە كيەۆ وبلىستارىندا زاقىم كەلگەن.
"جەكە كاسىپورىندار، كوپقاباتتى ۇيلەر جانە ازاماتتاردىڭ مۇلىكتەرى بۇلىنگەن", – دەپ مالىمدەدى ۋكراينا اۋە كۇشتەرى.
ۋكراينا توتەنشە جاعدايلار قىزمەتىنىڭ اقپاراتى بويىنشا، كيەۆ وبلىسىنداعى بروۆارى قالاسىندا درون سىنىقتارى 25 قاباتتى تۇرعىن ۇيگە قۇلاپ، ءورت باستالىپ، تۇرعىندار ەۆاكۋاتسيالانعان. زارداپ شەككەندەر جوق.
حەرسون وبلىسىنىڭ اسكەري اكىمشىلىگىنىڭ باسشىسى الەكساندر پروكۋدين تۇنگى شابۋىل سالدارىنان وڭىردە 22 جەكە ءۇيدىڭ بۇلىنگەنىن حابارلادى. ءبىر ادام قازا تاۋىپ، التاۋى جاراقات العان. ولاردىڭ اراسىندا ءبىر بالا بار.
