امەريكالىق اسكەري كۇشتەر قىزىل تەڭىزدە يەمەندىك حۋسيتتەرگە سوققى بەرگەن كەزدە وزدەرىنىڭ جويعىش ۇشاعىن كەزدەيسوق اتىپ تۇسىرگەندەرىن ايتتى، دەپ حابارلايدى "ادىرنا" ۇلتتىق پورتالى BBC-گە سىلتەمە جاساپ.
اقش قولباسشىلىعىنىڭ مالىمەتىنشە، F/A-18 Hornet ۇشاعى امەريكالىق اسكەري كەمەدەن جىبەرىلگەن زىمىرانمەن اتىپ تۇسىرىلگەن. ەكيپاجدىڭ ەكى مۇشەسى كاتاپۋلتپەن سەكىرىپ، امان قالعان. ءبىر ۇشقىش جەڭىل جاراقات العان.
«USS Harry S Truman اۆياتاسىمالداۋشى سوققى توبىنداعى USS Gettysburg زىمىراندىق كرەيسەرى كەزدەيسوق F/A-18 Hornet ۇشاعىنا سوققى بەرىپ، ونى اتىپ ءتۇسىردى. بۇل ۇشاق USS Harry S Truman اۆياتاسىمالداۋشىسىنان ۇشىپ شىققان ەدى»، – دەلىنگەن حابارلامادا.
وقيعا امەريكالىق اسكەريلەر يەمەننىڭ استاناسى ساناداعى زىمىران ساقتاۋ نىساندارى مەن حۋسيتتەردىڭ كوماندالىق ورتالىعىنا بىرنەشە اۋە سوققىسىن بەرگەننەن كەيىن بولعان.
اقش اسكەري كۇشتەرىنىڭ ايتۋىنشا، بۇل ساتتە يران قولدايتىن يەمەندىك كوتەرىلىسشى حۋسيتتەردىڭ بىرنەشە درونى مەن كەمەگە قارسى زىمىراندارىن دا جويعان. دەگەنمەن، ولار اتىپ تۇسىرىلگەن ۇشاقتىڭ حۋسيتتەرگە قارسى وپەراتسياعا قاتىسقان-قاتىسپاعانىن ناقتىلاعان جوق.
امەريكالىق قولباسشىلىقتىڭ مالىمدەۋىنشە، سانادعى سوققىلار حۋسيتتەردىڭ اقش كەمەلەرىنە جانە قىزىل تەڭىزدىڭ وڭتۇستىگىندە، باب-ەل-ماندەب بۇعازى مەن ادەن شىعاناعىنداعى ساۋدا كەمەلەرىنە شابۋىلىن بولدىرماۋعا باعىتتالعان.
حۋسيتتەر 2023 جىلدىڭ قازان ايىنان كەيىن، حاماس يزرايل اۋماعىنا شابۋىل جاساپ، گاز سەكتورىندا پالەستينالىق توپقا قارسى وپەراتسيا باستالعان سوڭ، يزرايل مەن باسقا ەلدەردىڭ كەمەلەرىنە زىمىراندار مەن دروندار جىبەرۋدى جيىلەتكەن.
2023 جىلدىڭ قاراشاسىنان باستاپ بۇل شابۋىلدار قىزىل تەڭىزدە ەكى كەمەنىڭ سۋعا باتۋىنا الىپ كەلدى. حۋسيتتەر دالەلسىز تۇردە تەك يزرايل، اقش جانە ۇلىبريتانيامەن بايلانىستى كەمەلەردى نىساناعا الاتىنىن مالىمدەيدى.
حۋسيتتەردىڭ ارەكەتتەرىنە جاۋاپ رەتىندە اقش، ۇلىبريتانيا جانە تاعى 12 مەملەكەت قىزىل تەڭىزدەگى ساۋدا جولدارىن قورعاۋ وپەراتسياسىن باستادى. بۇل تەڭىز ارقىلى ماڭىزدى ساۋدا مارشرۋتتارى وتەدى.
سەنبى كۇنى يزرايل اسكەري كۇشتەرى يەمەننەن جىبەرىلگەن زىمىراندى اتىپ تۇسىرە الماعاندارىن جانە ونىڭ تەل-اۆيۆتەگى ساياباقتاردىڭ بىرىنە تۇسكەنىن مالىمدەدى. ءيزرايلدىڭ توتەنشە جاعداي قىزمەتتەرى 16 ادامنىڭ تەرەزە سىنىقتارىنان جەڭىل جاراقات العانىن حابارلادى. تاعى 14 ادام باسپاناعا تىعىلۋعا تىرىسقاندا جاراقات العان. حۋسيتتەر وكىلى بۇل سوققىنىڭ گيپەردىبىستىق زىمىرانمەن جاسالعانىن مالىمدەدى.
اپتانىڭ باسىندا يزرايل حۋسيتتەردىڭ نىساندارىنا بىرنەشە سوققى بەرىپ، سانانىڭ پورتتارى مەن ەنەرگەتيكالىق ينفراقۇرىلىمدارىن جويعانىن حابارلادى. حۋسيتتەردىڭ دەرەكتەرى بويىنشا بۇل سوققىلاردان توعىز ادام قازا تاپقان.
حۋسيتتەر گازاداعى سوعىس اياقتالعانعا دەيىن شابۋىلدارىن جالعاستىراتىندارىن ۋادە ەتۋدە.
