قاراعاندى – استانا اۆتوجولىندا ءىرى كولەمدەگى ماريحۋانامەن ەسىرتكى تاسىمالداۋشىلار ۇستالدى، دەپ حابارلايدى "ادىرنا" ۇلتتىق پورتالى قاراعاندى وبلىسىنىڭ پوليتسيا دەپارتامەنتىنە سىلتەمە جاساپ.
كۇدىكتىلەر مىنگەن اۆتوكولىك تراسسادا توقتاتىلعان. Audi A6 اۆتوكولىگىنىڭ ىشىندە جامبىل وبلىسىنىڭ 38 جاستاعى ەكى تۇرعىنى بولعان. توقتاتۋ كەزىندە ولاردىڭ جۇيكەلەرى سىر بەرىپ، كۇدىك تۋعىزعان.
قاراعاندى وبلىسىنىڭ پوليتسيا قىزمەتكەرلەرى اۆتوكولىكتىڭ سالونى مەن جۇكسالعىشىن تەكسەرۋ بارىسىندا 13 قاپ وسىمدىك تەكتەس زات تاپتى. ساراپتاما قورىتىندىسى بويىنشا تاركىلەنگەن زاتتىڭ جالپى سالماعى 266 كيلوگرامنان اساتىن كەپتىرىلگەن ماريحۋانا ەكەنى انىقتالدى.
«بۇل فاكت بويىنشا قىلمىستىق ءىس قوزعالدى. پروكۋراتۋرانىڭ كەلىسىمىمەن كۇدىكتىلەرگە قاماۋدا ۇستاۋ تۇرىندەگى بۇلتارتپاۋ شاراسى تاعايىندالدى. قاراعاندى وبلىسىنىڭ پوليتسيا دەپارتامەنتى ەسىرتكى قىلمىستارىمەن كۇرەس جانە قۇقىقتىق ءتارتىپتى قورعاۋ بويىنشا جۇمىسىن جالعاستىرۋدا، ايماق تۇرعىندارىنىڭ قاۋىپسىزدىگىن قامتاماسىز ەتىپ وتىر», – دەپ مالىمدەدى قاراعاندى وبلىسى پد ءباسپاسوز قىزمەتى.
جىل باسىنان بەرى قاراعاندى وبلىسىندا زاڭسىز اينالىمنان 446 كيلوگرامم ءتۇرلى ەسىرتكى زاتتارى تاركىلەنگەن. ونىڭ ىشىندە 100 كيلوگرامنان استام گاشيش، 180 كيلوگرامنان استام ماريحۋانا جانە 12 كيلوگرامم سينتەتيكالىق ەسىرتكى بار. ەسىرتكى زاتتارىنىڭ زاڭسىز اينالىمىنا بايلانىستى 130-دان استام ادام ۇستالعان، ولاردىڭ ىشىندە 11 ءجاسوسپىرىم مەن 12 ايەل بار ەكەنى دە ۆەدومستۆونىڭ حابارلاماسىندا ايتىلدى.
