ەرتەڭ اباي اتىنداعى قازاق ۇلتتىق وپەرا جانە بالەت تەاترى حاميت شانعاليەۆتىڭ «حان سۇلتان. التىن وردا» وپەراسىنىڭ پرەمەراسىنا ارنالعان ءباسپاسوز جيىنىن وتكىزەدى.
جاقىندا سىزدەر الەمنىڭ تالانتتى شىعارماشىلىق تۇلعالارىنىڭ بىرلەسكەن ەڭبەگىنىڭ ناتيجەسىندە دۇنيەگە كەلگەن جاڭا ۇلتتىق وپەرا جارىققا شىعادى. ءۇش كۇن بويى ورتاعاسىرلىق الىپ مەملەكەت- التىن وردانىڭ قۇرىلۋىنا كۋا بولىپ، عاسىرلار قويناۋىنا جەتەلەيتىن، ۇلى سەزىمگە تولى ەستەن كەتپەس ساياحاتتى باستان كەشۋگە مۇمكىندىك تۋادى. مۇنىڭ بارلىعى تەاتر ارتيستەرى مەن بالەت بيشىلەرىنىڭ، حور مەن سيمفونيالىق وركەستردىڭ جاندى ورىنداۋى ارقىلى، ساحنانىڭ ترانسفورماتسيالىق دەكوراتسيالارى، جارىق ەففەكتىلەرى مەن بەينەپروەكتسيالاردىڭ ارقاسىندا جۇزەگە اسادى. بۇل تەحنولوگيالىق شەشىمدەر ءار كورەرمەندى قويىلىمنىڭ باستى كەيىپكەرىندەي سەزىندىرەدى.
وپەرانىڭ باستى كەيىپكەرى – حان سۇلتان جوشى حاننىڭ ءۇشىنشى ايەلى، التىن وردانىڭ بيلەۋشىلەرىنىڭ ءبىرى- بەركە حاننىڭ اناسى. ول اقىلدىلىعى، قايسار مىنەزى جانە ساياسي كورەگەندىگىنىڭ ارقاسىندا التىن وردا تاريحىنداعى ماڭىزدى تۇلعاعا اينالىپ، ءوزىن دە، ۇلدارىن دا جوشى ۇلىسىنداعى باستى قايراتكەرلەردىڭ قاتارىنا قوستى.
يدەيا اۆتورى-اينۇر كوپباساروۆا. دراماتۋرگ الماس ءنۇسىپتىڭ شىعارماسى نەگىزىندە «حان سۇلتان» وپەراسىن مارالتاي ىبىراەۆ جازىپ شىقتى. وپەرانىڭ رەجيسسەرى – ايگىلى يتالياندىق قويۋشى داۆيدە ليۆەرمور. ونىڭ سپەكتاكلدەرى ميلانداعى La Scala, ريم وپەراسى، تۋريندەگى Teatro Regio جانە گەنۋياداعى Carlo Felice تەاترلارىندا قويىلعان.
قويۋشى ديريجەر – اباي اتىنداعى قازاق ۇلتتىق وپەرا جانە بالەت تەاترىنىڭ جانە م.جالەل اتىنداعى تاتار اكادەميالىق وپەرا جانە بالەت تەاترىنىڭ باس ديريجەرى نۇرجان بايبوسىنوۆ.
التىن وردا مۇراسى تۇركى حالىقتارىن بىرىكتىرەتىن رۋحاني قازىنا بولىپ تابىلاتىندىقتان، وپەرانىڭ قويىلۋىنا تۇركىتىلدەس ەلدەردىڭ عىلىمي ورتالىقتارى مەن عالىمدارى زور ۇلەس قوستى. وپەرا جازۋ بارىسىندا التىن وردا مەن تۇركىتانۋ سالاسىنىڭ عالىمدارى، اتاپ ايتقاندا التىن وردا جانە تاتار حاندارىن زەرتتەۋ ورتالىعىنىڭ جەتەكشىسى يلنۋر ميرگالەەۆ، ىستامبۇل، مارمارا ۋنيۆەرسيتەتىنىڭ پروفەسسورى ءىلياس كەمالوگلۋ جانە تاريح عىلىمدارىنىڭ كانديداتى نۇرلان اتىعاەۆ عىلىمي كەڭەسشى رەتىندە قاتىستى.
افيشا اۆتورى – اسسول ساس، يلليۋستراتور-سۋرەتشى، گرافيك.
اسسول ءوز جۇمىسىن بىلاي سيپاتتادى: «جىرتقىش قۇستىڭ قاناتى مەن تۇمسىعى حان سۇلتاننىڭ ءجۇزىن باس كيىم ءتارىزدى جارتىلاي جاسىرىپ تۇر. بۇل ءارى قاۋىپتىڭ، ءارى قورعاۋدىڭ سيمۆولى ىسپەتتى. جانىپ جاتقان قالا – شايقاستاردى، جەڭىستەر مەن جەڭىلىستەردى بايانداسا، سول وقيعالاردىڭ ورتاسىنداعى ونىڭ تاعدىرى – جاۋىنگەرلەردىڭ ايەلى مەن اناسى رەتىندە كورىنىس تابادى».
