استانادا ۇلتتىق اكادەميالىق كىتاپحانادا قازاقستاننىڭ ەڭبەك ەرى، مەملەكەتتىك سىيلىقتىڭ لاۋرەاتى، قازاق ادەبيەتىنىڭ كلاسسيگى اكىم تارازيدىڭ ەسىمى بەرىلگەن ارنايى زال اشىلدى.
سونىمەن قاتار، بەلگىلى جازۋشىنىڭ 13 تومدىق شىعارمالار جيناعىنىڭ تۇساۋكەسەرى ءوتتى.
اكىم تارازيدىڭ قازاق ادەبيەتىن دامىتۋعا جانە ۇلتتىق رۋحانياتتى نىعايتۋعا قوسقان ۇلەسى وسكەلەڭ ۇرپاق ءۇشىن ۇلگى. جازۋشىنىڭ شىعارمالارى، اۋدارمالارى، پەسالارى مەن تاريحي زەرتتەۋلەرى توپتاستىرىلعان بۇل كوپتومدىق – باعا جەتپەس ءبىلىم كوزى.
اكىم تارازيدىڭ اتىنداعى جەكە زال وقىرماندارعا قازاق ادەبيەتىنىڭ كلاسسيكتەرى شىعارمالارىنىڭ جەكە كىتاپحاناسىن، فوتوسۋرەتتەر مەن جيناقتاردىڭ كەڭ اۋقىمىن ۇسىنادى.
شاراعا قاتىسقان استانا قالاسى ءماسليحاتىنىڭ توراعاسى ەرلان كاناليموۆ "توقساننىڭ تورىنە شىعىپ، ۇلت رۋحانياتىنىڭ ابىز اقساقالىنا اينالىپ وتىرعان اعامىزعا بار جىلى لەبىزىمدى تىلەي وتىرىپ، جاستان جاسقا، جاقسىلىقتان جاقسىلىققا قۋانىشپەن جەتە بەرىڭىز دەگىم كەلەدى! ەل اعالارى امان بولسىن!"- دەپ، ىزگى تىلەگىن ءبىلدىردى.
