18 قاراشا كۇنى دۋشانبەدە بيلىكتى باسىپ الۋ جانە مەملەكەتكە وپاسىزدىق جاساۋ ارەكەتى تۋرالى رەزونانستىق ءىس بويىنشا ەكىنشى سوت وتىرىسى ءوتتى. بۇل تۋرالى «ازيا-پليۋس» جازدى، دەپ حابارلايدى «ادىرنا» ءتىلشىسى.
ءىس بويىنشا سوتتالۋشىلار قاتارىندا بەلگىلى تاجىك ساياساتكەرلەرى مەن قوعام قايراتكەرلەرى، ونىڭ ىشىندە ەكس-ونەركاسىپ ءمينيسترى زايد سايدوۆ، بۇرىەعى باس پروكۋرور بوبودجون بوبوحونوۆ جانە تاجىكستان دەموكراتيالىق پارتياسىنىڭ بۇرىنعى باسشىسى ماحمادرۋزي يسكانداروۆ بار.
بۇگىنگى سوت وتىرىسىندا ءتورت ايىپتالۋشىنىڭ كۋالىگى تىڭدالدى. ولاردىڭ اراسىندا تاجىكستان سىرتقى ىستەر مينيسترلىگىنىڭ بۇرىنعى باسشىسى حامروحون زاريفي، بۇعان دەيىن سىرتقى ىستەر مينيسترلىگىندە اقپارات، ءباسپاسوز، تالداۋ جانە سىرتقى ساياساتتى جوسپارلاۋ دەپارتامەنتىن باسقارعان
ابدۋلفايز اتوي، ۇلتتىق قاۋىپسىزدىك كوميتەتىنىڭ ەكس-پولكوۆنيگتەرى
نۇرامين عانيزودا مەن دجامشەد بوەۆ بولدى.
ايىپتالۋشىلاردىڭ كوپشىلىگىنە تاجىكستان قىلمىستىق كودەكسىنىڭ 305 («مەملەكەتكە وپاسىزدىق») جانە 306 («بيلىكتى باسىپ الۋ») باپتارى بويىنشا ايىپ تاعىلىپ وتىر. ال كەيبىرەۋى قىلمىستىق كودەكستىڭ 247 («الاياقتىق») جانە 189-بابى («ۇلتتىق، ناسىلدىك، جەرگىلىكتى نەمەسە ءدىني ارازدىقتى قوزدىرۋ») بويىنشا كۇدىكتى دەپ تانىلدى.
الايدا سوتتالۋشىلار وزدەرىنە تاعىلعان ايىپپەن كەلىسپەيتىنىن جەتكىزدى.
قازىرگى تاڭدا سوت پروتسەسى تاجىكستاننىڭ مەملەكەتتىك ۇلتتىق قاۋىپسىزدىك كوميتەتى تەرگەۋ يزولياتورىنىڭ اۋماعىندا جابىق تۇردە ءوتىپ جاتىر. ءبىرىنشى وتىرىس 14 قاراشادا بولعان ەدى. سول كۇنى سوت ادۆوكاتتاردىڭ پروتسەستى اشىق زالعا كوشىرۋ تۋرالى ءوتىنىشىن قاناعاتتاندىرمايتىنىن جەتكىزدى.
«ءىس ماتەريالدارى قۇپيا بولىپ سانالعاندىقتان، پروتسەسس جابىق تۇردە ءوتىپ جاتىر. قوسىمشا اقپاراتتار بەرىلمەيدى»،—دەدى جوعارعى سوتتىڭ ءباسپاسوز قىزمەتى.
