قازاقستاندىق جاس شاحماتشىلار برازيليادا جاسوسپىرىمدەر اراسىندا (U14-U18) شاحماتتان وتكەن الەم چەمپيوناتىندا ءۇش كۇمىس پەن ءبىر قولا مەدال جەڭىپ الدى، دەپ حابارلايدى «ادىرنا» ءتىلشىسى.
اتاپ ايتساق، Open 14 ساناتىندا حالىقارالىق شەبەر IM ەدگار مامەدوۆ، Girls 18-دە WIM امينا قايىربەكوۆا، Open 18-دە IM الديار انسات كۇمىس جۇلدەگە يە بولدى. سونداي-اق Open 14 ساناتتا حالىقارالىق شەبەر IM ساۋات نۇرعاليەۆ قولا مەدال يەلەندى.
«ءبىزدىڭ جاستاردىڭ الەم چەمپيوناتىنداعى جەتىستىگى – تاڭدالعان تالانتتاردى قولداۋ ستراتەگيامىزدىڭ دۇرىستىعىن تاعى ءبىر رەت دالەلدەدى. وسى ورەندەرىمىزدىڭ ىشىندە قازاقستان شاحماتىنىڭ بولاشاعىن، بولاشاق الەم چەمپيوندارىن كورىپ وتىرمىز. جاس شاحماتشىلارىمىزدى جانە ولاردىڭ تابىسىنا ۇلەس قوسقان بارشا جاناشىرلاردى شىن جۇرەكتەن قۇتتىقتايمىن!» – دەدى 9 قاراشادا قازاقستان شاحمات فەدەراتسياسىنىڭ پرەزيدەنتى تيمۋر تۋرلوۆ.
ايتا كەتەيىك، U14–U18 جاسوسپىرىمدەر اراسىندا وتەتىن الەم چەمپيوناتى – 11 تۋر شۆەيتساريالىق جۇيە بويىنشا وتكىزىلەتىن، ەرەسەكتەردىكىندەي كلاسسيكالىق ۋاقىتتى ەسەپتەيتىن ساناۋلى تۋرنيرلەردىڭ ءبىرى. ءار ويىنشىعا العاشقى 40 جۇرىسكە 90 مينۋت، كەيىن پارتيانىڭ سوڭىنا دەيىن 30 مينۋت بەرىلەدى، ءار ءجۇرىس سايىن قوسىمشا 30 سەكۋند قوسىلادى.
