قازاقستاندا جەكە بالاباقشالارعا ليتسەنزيا ەنگىزۋ مۇمكىندىگى تالقىلانۋدا، دەپ حابارلايدى "ادىرنا" ۇلتتىق پورتالى.
ءبىلىم ءمينيسترى عاني بەيسەمباەۆ ماجىلىستە سويلەگەن سوزىندە مينيسترلىك ءبىرىنشى كەزەكتە بالالار ءۇشىن قاۋىپسىز ورتانى قۇرۋعا كوڭىل بولەتىنىن اتاپ ءوتتى. بۇگىندە ەلىمىزدەگى جەكەمەنشىك بالاباقشالاردىڭ سانى مەملەكەتتىك بالاباقشالاردىڭ سانىمەن بىردەي.
"بۇل جاعدايعا تەرەڭىرەك قاراپ، كەز كەلگەن شەشىمدى ابايلاپ قابىلداۋ كەرەك. كەرى اسەر ەتەتىن باسقا جاعدايدى تۋىنداتىپ الماۋىمىز قاجەت. كوپشىلىك كەلىسەدى دەپ ويلايمىن، مەملەكەتتىك مەكەمەلەردەن كەم ەمەس، جوعارى دەڭگەيدە جۇمىس ىستەيتىن جەكە ءبىلىم بەرۋ ۇيىمدارى بار. سوندىقتان ليتسەنزيالاۋ ماسەلەسىن تولىقتاي، مۇقيات تالقىلاۋ كەرەك، تەپە-تەڭدىك قاجەت", – دەدى عاني بەيسەمباەۆ.
ول ليتسەنزيالاۋ 2025 جىلعى قاڭتاردان باستاپ ەنگىزىلسە، كوپتەگەن جەكە بالاباقشالار وزگەرىستەرگە دايىن بولمايتىنىن ءتۇسىندىردى. سونىمەن قاتار، جاڭا تالاپتار ۆەدومستۆوعا قاتىستى نارازىلىق، تۇسىنبەۋشىلىك تۋدىرۋى مۇمكىن ەكەنىن ايتتى.
ء"بىز بارلىق دەتالداردى تالقىلاپ، زەرتتەپ، بارىنە ىڭعايلى، ەڭ باستىسى – بالالاردىڭ قاۋىپسىزدىگىن قامتاماسىز ەتەتىن شەشىم قابىلداۋىمىز كەرەك. تەك ليتسەنزيالاۋ ءۇشىن عانا ليتسەنزيالاۋ دۇرىس ەمەس دەپ سانايمىن. ءبىز بۇعان گۋماندىقپەن، اقىلمەن، ەشتەڭەنى قيراتپاي جەتۋىمىز كەرەك", – دەدى مينيستر.
ءماجىلىس دەپۋتاتى مارات ءباشىموۆ كاسىپكەردىڭ قۇقىقتارى بالالاردىڭ قۇقىقتارى باستالعان جەردە اياقتالاتىنىن باسا ايتتى. ول ءتارتىپ ورناتۋ ماقساتىندا بالاباقشالاردى ليتسەنزيالاۋدى قولدايدى.
"ليتسەنزيالاۋدى ەنگىزۋ كەرەك. تاربيە بەرۋ مەكەمەلەرىندەگى جاعداي ادام قۇقىقتارىنا، كونستيتۋتسياعا سايكەس كەلمەيدى. ءبىر جەردە ۇيىقتاۋعا، ءبىر جەردە تاماقتانۋعا بولمايدى. ولاردا وتباسىداعىداي جاعداي بولۋى كەرەك، بالالار قاراپايىم دەمالۋى قاجەت. تاعى دا ايتامىن: 10 شارشى مەترگە 50 ادامدى توپتاستىرىپ، ءبىر-بىرىنە كەدەرگى كەلتىرىپ، 5-6 رەتتەن اۋىرىپ جاتسا، بۇل بالالاردىڭ دەنساۋلىققا دەگەن قۇقىعىنا سايكەس كەلمەيدى", – دەدى ول.
