پرەزيدەنت قاسىم-جومارت توقاەۆ تۇركى مەملەكەتتەرى ۇيىمىنىڭ سامميتىنە قاتىسۋ ءۇشىن بىشكەك قالاسىنا باردى، دەپ حابارلايدى "ادىرنا" ۇلتتىق پورتالى، اقوردانىڭ ءباسپاسوز قىزمەتىنە سىلتەپ.
مەملەكەت باسشىسىن ماناس اۋەجايىنان قىرعىزستان مينيسترلەر كابينەتىنىڭ توراعاسى – قىرعىزستان پرەزيدەنتى اكىمشىلىگىنىڭ باسشىسى اقىلبەك جاپاروۆ قارسى الدى.
ايتا كەتەيىك، بۇعان دەيىن قىرعىزستاندىق باق-تا قازاقستان پرەزيدەنتى قاسىم-جومارت توقاەۆتىڭ بىشكەكتە وتەتىن تۇركى مەملەكەتتەرى ۇيىمىنىڭ XI سامميتىنە قاتىساتىنى تۋرالى اقپارات جاريالانعان بولاتىن.
ەسكە سالايىق، بۇگىن بىشكەكتە تۇركى مەملەكەتتەرى ۇيىمىنىڭ كەزەكتى XI ءسامميتى ءوتىپ جاتىر. ءسامميتتىڭ تاقىرىبى – «تۇركى الەمىن نىعايتۋ: ەكونوميكالىق ينتەگراتسيا، تۇراقتى دامۋ، تسيفرلىق بولاشاق جانە بارشاعا قاۋىپسىزدىك». سامميت جۇمىسىنا ۇيىمعا مۇشە مەملەكەتتەردىڭ باسشىلارى، سونداي-اق تمۇ-نىڭ باقىلاۋشى ەلدەرىنىڭ كوشباسشىلارى قاتىسادى.
تمۇ-عا مۇشە ەلدەر – ازەربايجان، قازاقستان، قىرعىزستان، تۇركيا جانە وزبەكستان، ال باقىلاۋشى ەلدەر – تۇرىكمەنستان جانە ۆەنگريا. تمۇ-نىڭ باس كەڭسەسى ىستامبۇلدا ورنالاسقان.
