29 قازان كۇنى ساعات 11:00-دە الماتى قالاسىنداعى «Mercure» قوناق ۇيىندە الماتى قالاسى ءدىن ىستەرى جونىندەگى باسقارماسىنىڭ قولداۋىمەن «JASTAR» دامىتۋ ورتالىعى جاستار قوعامدىق بىرلەستىگى ۇيىمداستىرعان ماراپاتتاۋ ءراسىمى ءوتتى, دەپ حابارلايدى «ادىرنا» ۇلتتىق پورتالى.
بۇل ءىس-شارادا ءدىن سالاسىنىڭ ماڭىزدى ماسەلەلەرى بويىنشا بىرنەشە نوميناتسيالار بويىنشا ۇزدىك ماتەريالدار ازىرلەگەن ازاماتتار ماراپاتتالدى. بايقاۋ ءساۋىر ايىندا باستالىپ، قازان ايىنا دەيىن جالعاسىپ، 6 اي ىشىندە 220-دان استام ماتەريال قابىلدانعان بولاتىن.
ۇسىنىلعان جۇمىستار زايىرلىلىق، تولەرانتتىق، كونفەسسياارالىق كەلىسىم، قازاق حالقىنىڭ رۋحاني قۇندىلىقتارى، ءداستۇر مەن ءدىن، پاتريوتيزم، وتانعا دەگەن ماحاببات، سونداي-اق راديكالدى ءدىني يدەولوگيانىڭ، ءدىني ەكسترەميزم مەن تەرروريزمنىڭ زياندىلىعى سەكىلدى ماڭىزدى تاقىرىپتاردى قامتىدى. ءراسىم بارىسىندا 10 نوميناتسيا بويىنشا ۇزدىكتەر ماراپاتتالدى، ولاردىڭ ىشىندە: DIGITAL ART شەڭبەرىندەگى ۇزدىك فوتو جوبا، ۇزدىك ولەڭ، ۇزدىك ۇندەۋ جانە ۇران، ۇزدىك پىكىر، تاقىرىپتىق پوست، ۇزدىك ماقالا، ورىس تىلىندەگى ۇزدىك ماقالا، ۇزدىك بەينەروليك، TikTok-تاعى ۇزدىك بەينەروليك، ۇزدىك الەۋمەتتىك بەينەروليك.
جيىندى الماتى قالاسى ءدىن ىستەرى جونىندەگى باسقارما باسشىسىنىڭ ورىنباسارى ايداربەكۇلى الىمبەك جانە جاستار دامىتۋ ورتالىعى جاستار قوعامدىق بىرلەستىگىنىڭ توراعاسى مۇراتباەۆ قانىبەك قۇتتىقتاۋ سوزدەرىمەن اشتى. «جۇيرىكتەن جۇيرىك وزار جارىسقاندا»، دەمەكشى، بۇل بايقاۋدى ۇيىمداستىرۋداعى باستى ماقساتىمىز – ءدىني ەكسترەميزمگە قارسى ءتيىمدى اقپاراتتىق ماتەريالدار ازىرلەپ، ولاردى قوعامعا قولجەتىمدى ەتۋ، سونىمەن قاتار قازاق حالقىنىڭ رۋحاني قۇندىلىقتارىن دارىپتەۋ، ءداستۇر مەن دىنگە، وتانعا دەگەن ماحابباتتى ارتتىرۋ»، – دەپ اتاپ ءوتتى الىمبەك ايداربەكۇلى.
جارىستىڭ جالپى جۇلدە قورى 3 ميلليون تەڭگەنى قۇرادى. قاتىسۋشىلارعا ىنتالاندىرۋ رەتىندە 100 000 تەڭگە سوماسىنداعى قوسىمشا قارجى بولىنگەن. نەگىزگى جۇلدەلەر 250 000, 300 000 جانە 350 000 تەڭگەدەن بەرىلدى، ال ىنتالاندىرۋ سىيلىقتارى 50 000 تەڭگەنى قۇرادى.
«قاتىسۋشىلار اراسىندا قازۇۋ، نۇر-مۇباراك، سەكىلدى ءىرى وقۋ ورىندارىنان كەلگەن ستۋدەنتتەر دە بولدى. ءبىرىنشى جانە ەكىنشى كۋرس ستۋدەنتتەرى ءۇشىن بۇل جۇلدە ولاردىڭ بولاشاققا دەگەن سەنىمىن نىعايتىپ، ءدىني تاقىرىپتاردا جۇمىس ىستەۋگە دەگەن ىنتاسىن وياتتى. «جۇلدە قورى ستۋدەنتتەر ءۇشىن ۇلكەن موتيۆاتسيا بولدى، اسىرەسە، جاڭادان وقۋعا تۇسكەن جاستار ءۇشىن. كوپشىلىگى جەڭىسىن ەستىگەندە وتە قاتتى قۋاندى. ءبىز دە وسىنداي شارانى قايتا ۇيىمداستىرۋعا نيەتتىمىز»، – دەيدى «JASTAR» دامىتۋ ورتالىعىنىڭ توراعاسى مۇراتباەۆ قانىبەك.
بۇل بايقاۋ جاستار اراسىندا ءدىني ساۋاتتىلىقتى ارتتىرىپ قانا قويماي، ولاردى رۋحاني قۇندىلىقتارعا جاقىنداتىپ، پاتريوتتىق سەزىمدەرىن نىعايتۋعا ىقپال ەتتى. جۇلدە قورى مەن ماراپاتتار ستۋدەنتتەر ءۇشىن زور موتيۆاتسياعا اينالىپ، ولاردى قوعامداعى وزەكتى ماسەلەلەر بويىنشا بەلسەندى پىكىر قالىپتاستىرۋعا، زايىرلىلىق پەن كونفەسسياارالىق كەلىسىمدى قولداۋعا شابىتتاندىردى.
وسىنداي بايقاۋلار ءدىن سالاسىنداعى تۇراقتىلىقتى نىعايتىپ، قازاق حالقىنىڭ داستۇرلەرى مەن مادەنيەتىن دارىپتەۋگە ىقپال ەتەتىن ماڭىزدى قادام. ۇيىمداستىرۋشىلاردىڭ ايتۋىنشا، بۇل باستاما الداعى جىلدارى دا جالعاسىن تاۋىپ، جاستار اراسىندا دەسترۋكتيۆتى يدەولوگيالارعا قارسى تۇراتىن جاڭا جوبالاردى قولداۋعا باعىتتالماق.
