ۇكىمەتتە وتكەن ءباسپاسوز ماسليحاتىندا ۆيتسە-پرەمەر جۇمانعارين ۇكىمەتتىڭ دوللار باعامىنىڭ وسۋىنە بايلانىستى ازىق-تۇلىك باعاسىن قالاي ۇستاپ تۇرۋدى جوسپارلاپ وتىرعانىن ءتۇسىندىردى, دەپ حابارلايدى «ادىرنا» ۇلتتىق پورتالى.
ونىڭ ايتۋىنشا، قازاقستان الەۋمەتتىك ماڭىزى بار 10 ونىممەن ءوزىن تولىق قامتاماسىز ەتەدى. ولاردىڭ قاتارىندا ۇن، تۇز، كۇرىش، ماكارون، ماي، كارتوپ، قوي ەتى، سيىر ەتى، ءسابىز بار. تاعى 14 ءونىم بويىنشا قامتاماسىز ەتۋ دەڭگەيى 80%-دان اسادى، ال كەيبىر ونىمدەردە يمپورتقا تاۋەلدىلىك بار: مىسالى، قۇس ەتىمەن قامتاماسىز ەتۋ 73%، شۇجىق — 60%، بالىق — 60%، ىرىمشىك پەن سۇزبە — 46%، قانت — 44%.
سونداي-اق، قازاقستاندا وندىرىلمەيتىن ونىمدەر، مىسالى، اپەلسين، بانان، ليمون سياقتى كەيبىر جەمىستەر مەن كوكونىستەردىڭ قىمباتتاۋى مۇمكىن ەكەنى ايتىلدى. الايدا جۇمانعارين ولاردىڭ باعاسى ايتارلىقتاي كوتەرىلمەيتىنىن اتاپ ءوتتى.
سونىمەن قاتار، ەۋرازيالىق ەكونوميكالىق كوميسسيانىڭ الاڭىندا وسى ونىمدەرگە ارنالعان كەدەندىك باجداردى تومەندەتۋ ماسەلەسى قاراستىرىلىپ جاتقانىن مالىمدەدى. بۇل شەشىم جاقىن ارادا قابىلدانادى دەپ كۇتىلۋدە.
جۇمانعارين سوڭعى اپتاداعى باعا مونيتورينگىنە سايكەس، دۇكەندەردەگى باعالار ايتارلىقتاي وزگەرمەگەنىن اتاپ ءوتتى.
