اتىراۋ قالاسىنىڭ تۇرعىنى، 23 جاستاعى يانا لەگكوديموۆا 2024 جىلدىڭ 18 قازانىندا ۇيىنەن شىعىپ كەتىپ، جوعالىپ كەتكەن. پوليتسەيلەر قىزدى ءولتىرىپ، وزەنگە لاقتىرىپ كەتكەنىن انىقتادى، دەپ حابارلايدى «ادىرنا» ۇلتتىق پورتالى.
اتىراۋ وبلىستىق پوليتسيا دەپارتامەنتىنىڭ ءباسپاسوز قىزمەتىنىڭ ايتۋىنشا، اتالعان فاكتى بويىنشا قر قىلمىستىق كودەكسىنىڭ «ادام ۇرلاۋ» جانە «ادام ءولتىرۋ» باپتارى بويىنشا قىلمىستىق ءىس قوزعالعان. قىزدىڭ دەنەسى ءالى تابىلعان جوق.
«كەشەندى تەرگەۋ شارالارى باستالدى. 24 جانە 25 جاستاعى ەكى كۇدىكتى ۇستالىپ، ۋاقىتشا ۇستاۋ يزولياتورىنا قامالدى. جەدەل ىزدەستىرۋ جۇمىستارى بارىسىندا كۇدىكتىلەر تۇنشىقتىرىپ ءولتىرىپ، قىزدىڭ دەنەسىن ماحامبەت اۋدانى تالدىكول اۋىلىنداعى جايىق وزەنىنە لاقتىرىپ جىبەرگەنى انىقتالدى. ونى اتىراۋ وبلىسى تجد سۇڭگۋىرلەرىمەن بىرلەسىپ ىزدەۋدە. وزگە اقپارات تەرگەۋ مۇددەسى ءۇشىن جاريا ەتىلمەيدى»، - دەپ حابارلادى اتىراۋ وبلىسىنىڭ ءباسپاسوز قىزمەتى.
