اۆتور: ۇكىلىماي ۇسەنقىزى يسابەك
بايلانىس تەلەفوندارى: 87753388654, 87014498396
جازدىڭ شىلىڭگىر شىلدەسى. اجەم ەسىك الدىنداعى قوسا جابىسقان ەكى وشاقتىڭ بىرىنە كەسىلىپ دايىن بولعان باۋىرساعىن شىجىپ تۇرعان مايعا ءبىر ۋىسقا لايىقتالعان مولشەردە سالىپ كەپ جىبەردى. ءزايتۇننىڭ قىزۋىنا بالقىعان اق قامىر امالسىزدان رەڭى قۇبىلىپ، پىسۋگە تاياۋ. وشاق الدىندا جۇزىمنەن شابىلىپ الىنعان شىبىقتاردى شىتىرلاتا تىزەممەن سىندىرىپ وتتى بارىنشا قىزدىرۋدامىن. ۋاقىت بولسا اسىردان ءوتىپ، اقشامعا جاقىنداپ قالعان ءسات. ورىستەن سيىر قايتادى، ادىردان قوي قايتادى. ارقايسىسىن ورىندارىنا جايلاستىرۋ مەنىڭ كۇندەگى داعدىما اينالىپ كەتكەلى قاشان؟! وسىنداي قىم-قۋىت تىرشىلىكتىڭ ارقاسىندا ەڭبەككە ەرتە ءسىڭىسىپ، بارلىق نارسەنىڭ ميحناتپەن كەلەتىنىنە كوز جەتكىزدىك. «ءبىر تارشىلىقتىڭ دا، ءبىر مولشىلىعى بولادى»، - دەپ وتىرادى كوپتى كورگەن اجەم. ءسىرا، وشاق الدىندا تەرەڭ ويعا باتىپ كەتسەم كەرەك، كەنەت باۋىرساقتىڭ ءپىسىپ بولعانىن دا اڭداماي قالىپپىن. سارى شارانىڭ ىشىندەگى تاڭداي قاقتىرارلىق ءدامى بارىن سەزگەننەن كەيىن بە، الگى توقاشقا باس سالىپ كىرىسە كەتكىم كەلدى. قولىمنىڭ ۇشىمەن ەندى بىرەۋىن الا بەرگەندە اجەم:
- ءاي، جۇگەرمەك! ماقسات قويلاردى ايداپ كەلە جاتىر. سەنىڭ ەرسىل-دەرتىڭنىڭ ءبارى نان سوعۋ، - دەپ باي-بايعا سالىپ ۇيدەن قۋا جونەلدى.
كوشەگە اتىپ شىعا سالىسىمەن ءورىستى بەتكە الىپ بار پارمەنىممەن جۇگىرە جونەلدىم. ءبىزدىڭ اۋىلدا قوي كەزەكپەن باعىلادى. بۇگىن ساقيلانىڭ ۇلى ماقساتتىڭ كەزەگى ەدى. كوشە ۋ-دا شۋ. شاڭنىڭ كوتەرىلگەنى سونشالىق توپىراق ءيىسى مۇرىنىڭدى جارىپ، قولقاڭدى قابادى. ءا، شىركىن! - دەدىم ىشىمنەن. وسى توپىراققا ءسال عانا جاڭبىر سەبەلەسە عوي، تابيعاتتىڭ بار بولمىسى سوندا اشىلار ەدى. ماقسات اۋىلدىڭ قورا-قورا قويىن الدىنا سالىپ ايداپ كەلە جاتتى. بالالارمەن قورشالاپ ءجۇرىپ ازەر دەگەندە ون جەتى باس قويىمدى بولە سالا قۇيرىقتارىن بىلقىلداتىپ، ۇيگە قاراي تىرقىراتا قۋا جونەلدىم. مەن دە ەس جوق. وزىمشە ءمازبىن. سىلقىلداپ كۇلىپ كەلگەن كۇيى قويلاردى اۋلاداعى قوتانعا قاماپ، ورىستەن قايتىپ كەلە جاتقان سيىردى ايداپ اكەلۋگە قايتا شىقتىم. كوشەدە تاياعىن تاقىلداتىپ، كەڭەس اقساقال اناداي جەردە ماڭ-ماڭ باسىپ كەلە جاتقان. بالا كورسە ءاتپىش بەر، تۇشكىرەيىن دەپ قيقاڭدايتىن. اقساقال ورىسكە بارعاندا جاس بالالارعا بۇيىدەي تيگىسى كەلىپ، ءوزى دە بالاشا ويناي جونەلەتىن. ونىڭ كۇندەگى ادەتىن جاقسى بىلەتىن مۇقاش ماناعى اتانىڭ توبەسىن كورگەننەن ءىزىم قايىم تۇرعان جەرىنەن جوق بولاتىن. موڭىرەپ كەلە جاتقان سيىر ىشىنەن الا قۇناجىن مەن قارا سيىرىمدى جانە ەندى عانا كىبىرتىكتەپ شىعىپ كەلە جاتقان كىشكەنە ءمۇيىزدى بۇقامدى ىزدەدىم. قاراسام مەنى كورگەننەن ۇشەۋى دە ماعان قاراي داۋىس شىعارىپ، ۇيگە اپارار سوقپاقپەن اياڭداپ بارا جاتتى. بۇقامنىڭ قۇيرىعىن تاس قىلىپ ۇستاعان كۇيى ۇشەۋىن دە الدىما سالىپ قوراعا ايداپ كىرە سالا ورىندارىنا اپارىپ بايلاپ، قارا سيىرىمنىڭ بۇزاۋىن ءسال عانا ەمىزىپ، اناما ساۋدىرىپ الدىم. ساۋعاننان كەيىن بۇزاۋىن قويا بەرىپ جىبەرگەنىم سول ەدى، بايعۇس اناسىن سىلقىلداتا ەمۋگە كىرىستى. قاسىنا بۇزاۋىن بايلاپ، مالىمنىڭ كەشكى جەم-ءشوبىن الدارىنا سالىپ، كوشەگە شىعىپ بادام وزەنىنە قاراي اياڭدادىم. وزەن جاعاسىندا ورىستەن مال كەلگەننەن كەيىن، مىندەتتى تۇردە اۋىل اقساقالدارى جينالىپ، كەشكى سالقىندا اڭگىمە دۇكەن قۇرادى. وماش پەن ەلەۋ اتالاردىڭ ونەگە-وسيەتتەرىن تىڭداپ، سول كىسىلەردىڭ باتاسىن الۋعا تىرىسامىن. ءوز باسىم تاڭەرتەڭ باقتاشىنىڭ الدىنا اقساقالداردىڭ مالدارىن وزىمدىكىمەن قوسا سالىپ بەرەم. قاريالار ءبىزدى رازى قىلساڭ، قۇداي ساعان رازى بولسىن، زەڭگى بابا قولداسىن، - دەپ قوس قولدارىن جايىپ، ىرزاشىلىقتارىن بىلدىرگەندە، وزىمدە بالالىق باقىتتىڭ نە ەكەنىن ۇعىنعانداي بولام! ەح، اۋىلىم! بۇرقىراعان شاڭ، پەيىلى كەڭ ادامدار، بۇلبۇلدىڭ اسەم ءۇنى، تابيعاتتاعى تۇنگى تىنىشتىق ايتا بەرسەم تاۋسىلمايدى، ءبارى-ءبارى سەندە عوي عاجابىم. تۋعان جەرىم!
