بولات اعا ومىردەن ءوتتى... ءفوتوتىلشى بولات. شەبەر بولات. مايتالمان بولات. بالداعى التىن قۇرىش بولات.
التىن بالداعى – قيىرداعىنى شالاتىن، كوزدەگەنىن قالت جىبەرمەيتىن، توبەسىنەن قۇس ۇشىرمايتىن، باعا جەتپەس فوتوااپاراتى. قۇرىش دەگەنىمىز – سۋرەت ءتۇسىرۋ ونەرىنىڭ شىڭىنا شىققان بولات اعانىڭ سيپاتتاماسى.
ءوز كاسىبىنىڭ قىر-سىرىن جەتىك يگەرىپ، شىن شەبەر اتانۋ ءۇشىن ەلدىڭ زيالىلارى شوعىرلانعان ورتالىق قالالاردىڭ بىرىندە تۇرۋ شارت ەمەس. سونداي-اق جالپاق جۇرتتى ەلەڭ ەتكىزەتىن ەرەكشە سۋرەت ءتۇسىرۋ ءۇشىن فوتومىلتىعىڭنىڭ تۇمسىعى ءتورت قارىس، قۇنى جايىنباس كولىك ساتىپ الۋعا جەتەتىندەي تىم قىمبات بولۋى دا مىندەتتى ەمەس. ول بىرەۋدە بار، بىرەۋدە جوق قاراپايىم فوتواپپاراتىمەن-اق عالامات پورترەتتەر مەن عاجايىپ پەيزاجداردى، ادەمى كورىنىستەر مەن اسەرلى ەتيۋدتەردى ءباسپاسوز تاريحىندا قالدىردى. سىر بويىنداعى كونە قالانىڭ ارعى باسى مەن بەرگى باسىندا تىنىمسىز شاپقىلاپ، سول ءوڭىردىڭ اتاقتى اۋداندارى مەن الىس اۋىلدارىن ارمانسىز ارالاپ ءجۇرىپ-اق، الماتى مەن استانا جاقتان اندا-ساندا شاڭ بەرىپ قالاتىن ايگىلى ادامداردى نىساناعا الىپ، تانىمال تۇلعالار گالەرەياسىن جاسادى.
ونىڭ ءار كادرى قۇندى بولدى. وزگەلەر سۋرەت ءتۇسىردى. ول سيۋجەت ءتۇسىردى. وزگەلەر پورترەت ءتۇسىردى. ول پورترەتتىك وچەرك ءتۇسىردى. وزگەلەر شوپاننىڭ سۋرەتىن ءتۇسىردى. ول شوپان تۋرالى شىعارما ءتۇسىردى. سونىڭ ءبارىن ءبىر-اق كادرعا سىيعىزدى. ونىڭ شىرت ەتكىزگەنى شەدەۆر بوپ شىعادى. ول قازاق فوتوونەرىنە كوركەمدىك اكەلدى. اسەمدىك پەن ادەمىلىك دارىتتى. سەن دە، مەن دە، ول دا تۇسىرە الاتىن جانسىز سۋرەتكە بەللەتريستيكانىڭ جۇگىن ارقالاتتى. مىنە، بالداعى التىن قۇرىش بولاتتىڭ بالداعى بولەك باسقالاردان ايىرماشىلىعى دا وسىندا.
ونىڭ كەيىپكەرلەرى سويلەپ تۇرادى. شەتىنەن مىنەزدى. شەتىنەن شەجىرەلى. شەتىنەن قيقار. شەتىنەن شەشەن. سەبەبى، سۋرەتتىڭ كەيىپكەرلەرى سۋرەتتىڭ اۆتورىنا قاتتى ۇقسايدى.
مەن بولات اعا وماراليەۆتىڭ ءبىراز سۋرەتىن ارقاۋ ەتىپ، بىرقاتار ماقالا جازدىم. ويعا العان ءبىراز جوسپارلارىمىز بارشىلىق ەدى. ءومىردىڭ ءوزى كەيدە وسىلاي جوسپار-جوباڭا باعىنباي كەتەدى ەكەن عوي.
كوبىنە-كوپ كينو مەن تەلەۆيزيا الەمىنە تەسىلى «ستوپ-كادر» دەگەن ۇعىم بار. ەڭ ءساتتى نەمەسە ەڭ قاجەتتى ءبىر كادردى تاڭداپ الىپ، وسىنىڭ توڭىرەگىندە وي تولعايسىڭ. نەمەسە سونىڭ اينالاسىنان ماسەلە تۋىنداتاسىڭ. وسى «ستوپ-كادر» ۇعىمى ايگىلى ءفوتوتىلشى بولات وماراليەۆتىڭ دە شىعارماشىلىق تابيعاتىن تاپ باساتىن. قاراۋىلعا العانىن ءمۇلت جىبەرمەيتىن ول سەيداحمەت بەردىقۇلوۆ اعامىز ايتقانداي، جۇمىر جەردى كىندىگىنەن ۇستاپ، سولقىلداتىپ تارتىپ تۇرىپ، تۋلاپ جاتقان تىرشىلىكتى لەزدە توقتاتىپ تاستاي الاتىن. ەڭ ادەمى، ەڭ اسەرلى دەگەن مەزەتتى اڭدىپ تۇرىپ، قاس-قاعىم ساتتە قاعىپ تۇسىرەتىن. جۇرتتىڭ كوزىنە ىلىنە بەرمەيتىن قالتارىستاعى ولجانى الىستان اڭعارىپ، جان بالاسىنا بىلدىرمەي قاقشىپ الا قوياتىن.
وسىنداي تەڭدەسسىز شەبەر بولعانىنا قاراماستان بولات اعانىڭ سوڭىنان شاكىرت ەرمەدى. ەرەتىندەي دە مۇمكىندىك تۋمادى. ول ءۇشىن كەيىنگى بالالار بولات اعانىڭ ءوزى سەكىلدى قىستا قار كەشىپ، جازدا جانتاق جاستانىپ، جاڭبىرعا جۋىنىپ جۇرە بەرەتىن جانكەشتى بولۋى قاجەت ەدى. سوندىقتان ول ۇنەمى سىر بويىنداعى قالىڭ قامىس اراسىندا قالىپ قويعان سول باياعى جوتالى جولبارىس قۇساپ جالعىز جورتتى. جالعىز ءجۇرىپ-اق جارتى الەمگە تانىلدى.
مىنە، ەندى بولات اعامىزدىڭ سوڭعى ساعاتى سوقتى... تالايدى تامساندىرعان «ستوپ-كادر» وسىلاي توقتادى. ادەتتە «ستوپ-كادر» پايدالانىلىپ بولعان سوڭ جىبىر-جىبىر ەتىپ، قايتا جالعاساتىن. قوزعالىسىن كىلت تەجەپ، بىردەن سىرەسىپ قاتىپ قالعان بەينەگە قايىرا جان بىتەتىن. ال بۇل «ستوپ-كادردىڭ» توقتاعانى توقتاعان ەندى... ماەسترو ماڭگىلىك مەكەنىنە كەتىپ بارادى... باقۇل بولىڭىز، اعا!
