2024 جىلدىڭ 30 تامىز كۇنى اباي وبلىسىندا 5-ءشى دۇنيەجۇزىلىك كوشپەندىلەر ويىندارىنا ارنالعان ماڭىزدى ءىس-شارالاردىڭ ءبىرى – «بىرلىك كەرۋەنىن» استانا قالاسىنا شىعارىپ سالۋ ءراسىمى ءوتتى.
بۇل كەرۋەننىڭ ساپارى، كوشپەندىلەر ويىندارىنىڭ باستى نىشانى جانە نەگىزگى ەلەمەنتى – سۋ سيمۆولىمەن تىعىز بايلانىستى.
وسى ءراسىم ۇلى ابايدىڭ تۋعان جەرى سىرت قاسقابۇلاقتا باستاۋ الدى. بۇل جەردەن «بىرلىك كەرۋەنىن» باستاپ، قازاق كۇرەسىنەن الەم چەمپيونى، «قازاقستان بارىسى» اتاعىن يەلەنگەن ايبەك نۇعىماروۆ قاسيەتتى سۋدى الىپ شىقتى. سۋ 5-ءشى دۇنيەجۇزىلىك كوشپەندىلەر ويىندارىنىڭ اشىلۋ سالتاناتىندا ماڭىزدى ورىن الماق.
«بىرلىك كەرۋەنى» سەمەي قالاسىنا كەلگەندە، ولاردى قارسى الۋ ماقساتىندا امىرە قاشاۋباەۆ اتىنداعى مەملەكەتتىك فيلارمونياسىنىڭ «بيبىگۇل» قازاق حالىق اسپاپتار وركەسترى، «دالا ءۇنى» ا كاپەللا توبى، «دالا سازى» ەتنو-فولكلورلىق ءانسامبلى جانە «تۇمار» بي ءانسامبلى ونەرلەرىن كورسەتتى.
قۇرمەتكە يە بولعان كەرۋەن استاناعا قاراي جولعا شىقتى. 5-ءشى دۇنيەجۇزىلىك كوشپەندىلەر ويىندارىنىڭ اشىلۋ سالتاناتىندا ءار ءوڭىردىڭ باتىرلارى وزدەرى الىپ كەلگەن قاسيەتتى سۋدى ءبىر قازانعا قۇيىپ، بۇل ەلدىڭ بىرلىگىن، تۇتاستىعىن جانە ءوزارا ىنتىماقتاستىعىن كورسەتەتىن بولادى.
سونىمەن قاتار، ءدال وسى كۇنى 5-ءشى دۇنيەجۇزىلىك كوشپەندىلەر ويىندارىنا اباي وبلىسىنىڭ اتىنان قاتىساتىن قولونەرشىلەردىڭ كورمەسى ءوتتى. كورمەدە ءوڭىردىڭ شەبەرلەرى وزدەرىنىڭ ەڭ ۇزدىك تۋىندىلارىن ۇسىندى.
ايتا كەتەرلىك جايت، 5-ءشى دۇنيەجۇزىلىك كوشپەندىلەر ويىندارى اياسىندا ۇزدىك قولونەر شەبەرلەرىنىڭ ونىمدەرى كورمەگە قويىلىپ، اقىندار ايتىسى، سالت-ءداستۇردى ناسيحاتتايتىن قويىلىمدار ۇيىمداستىرىلادى. اباي وبلىسىنان وسى حالىقارالىق دەڭگەيدەگى شاراعا 6 سپورت تۇرىنەن 12 قاتىسۋشى مەن 100-دەن اسا مادەنيەت مەن ونەر سالاسىنىڭ مايتالماندارى اتسالىسادى.
