ورال قالاسىندا سۋ تاسقىنى سالدارىنان جالعىز باسپاناسى جارامسىز دەپ تانىلعان تاعى 10 ساياجاي تۇرعىنى باسپانالى بولدى. جاڭا پاتەرلەر دەمەۋشىلەر قارجىسىنا ساتىپ الىندى.
ۇكىمەت باسشىسىنىڭ تاپسىرماسىنا سايكەس، قارجىلىق ۇيىمدار مەن دەمەۋشىلەر وڭىردەگى زارداپ شەككەن تۇرعىندارعا قول ۇشىن سوزىپ، كومەگىن بەرۋدە.
باتىس قازاقستان وبلىسىنىڭ اكىمى ناريمان تورەعاليەۆ ورال قالاسىنىڭ ورتالىعىنداعى «ومەگا» تۇرعىن ءۇي كەشەنىندە بولىپ، قونىس يەلەرىن باسپانالى بولۋىمەن قۇتتىقتادى.
«مەملەكەت باسشىسى سۋ تاسقىنىنان زارداپ شەككەن تۇرعىندارعا ءتيىستى كومەك كورسەتۋدى تاپسىرعان بولاتىن. جالعىز باسپاناسى بولىپ تابىلاتىن ساياجاي يەلەرىنە مىنە بۇگىن تاعى دا بىرنەشە پاتەرلەر بەرىپ جاتىرمىز. جالپى وسى ۋاقىتقا دەيىن 750 ساياجاي تۇعىنى باسپاناعا يە بولدى. سونداي-اق، ورالدا 374 ءۇيدىڭ قۇرىلىسى ءجۇرىپ جاتىر»- دەپ اتاپ ءوتتى وبلىس اكىمى ناريمان تورەعاليەۆ.
نۇرلى جول ساياجاي ۋچاسكەسىنىڭ تۇرعىنى قايىرعالي ايتقاليدىڭ جالعىز باسپاناسى سۋعا كەتىپ، جارامسىز دەپ تانىلعان. بۇگىن ول جاڭا پاتەرىنە كىردى.
«كوكتەمگى تاسقىن كەزىندە ءۇيىمىزدى سۋ باستى. 3 اي كۇتتىك. بۇگىن جاڭا پاتەردىڭ كىلتىن قولىمىزعا الدىق. قالانىڭ ورتالىعىندا جاڭا ۇيدە تۇرامىز دەپ كۇتكەن جوقپىز. وسىنداي جاعداي جاساعان مەملەكەت باسشىسىنا العىسىمدى بىلدىرەمىن»، - دەدى ول.
ورالدىق ساياجاي تۇرعىندارىن باسپانامەن قامتۋ جۇمىستارى الداعى ۋاقىتتا دا جالعاسىن تاباتىن بولادى.
