قازاقستاندىق وقۋشىلارعا شامادان تىس كوپ وقۋ مىندەتتەلگەن. بۇل تۋرالى سەناتور التىنبەك نۇقۇلى پرەمەر-ءمينيستردىڭ ورىنباسارى تامارا دۇيسەنوۆاعا جولداعان دەپۋتاتتىق ساۋالىندا ايتتى، دەپ حابارلايدى «ادىرنا» ءتىلشىسى.
«ءبىلىم ساپاسى مىقتى ەلدەر سانالاتىن جاپونيا، وڭتۇستىك كورەيا، فينليانديا جانە كانادادا 7-8 سىنىپتا وقۋشىلار ناقتى عىلىمعا قاتىستى 4-6 ءپان وقيدى، ال قازاقستاندا 15 ءپان. ءتىپتى 9-سىنىپتا 16 ءپان وقىتىلادى. ەلىمىزدە مىندەتتى وقۋ پاندەرىنىڭ سانى 2,5 ەسە كوپ. شەتەلدەگى مەكتەپتەردە حيميا، بيولوگيا جانە گەوگرافيا سياقتى پاندەر بىرىكتىرىلىپ، عىلىم ءپانى رەتىندە وتە از وقىتىلادى. وسىعان قاراماستان سوڭعى 15 جىلداعى حالىقارالىق PISA زەرتتەۋىنىڭ قورىتىندىسى بويىنشا وسى ەلدەردەگى وقۋشىلاردىڭ جاراتىلىستانۋ عىلىمى بويىنشا ساۋاتتىلىعى جوعارى سانالادى. بۇل پاندەر سانىنان وقىتۋ ساپاسى ماڭىزدى ەكەنىن كورسەتەدى»،—دەدى ول.
سەناتور وقۋلىقتاردىڭ ءتىلى اۋىر ەكەنىن دە اتاپ ءوتتى.
«قازاقستاندا وقۋشىلارعا تاقىرىپ بويىنشا شامادان تىس كولەمدى اقپارات بەرىلەدى، ال وقۋلىقتاردىڭ ءتىلى اۋىر. ال ۇلىبريتانيادا كەرىسىنشە، اقپارات كولەمدى ەمەس، تاقىرىپتار تاجىريبەگە باعىتتالىپ، كۇندەلىكتى ءومىردىڭ جاعداياتتارىمەن بايلانىستىرىلىپ وقىتىلادى. باسقاشا ايتقاندا، وقۋشىنىڭ الداعى ومىرىندە قانشالىقتى ماڭىزدى ەكەنىن تۇسىندىرۋگە كوپ كوڭىل بولىنەدى. ورتا ءبىلىم سالاسىندا ساپالى ءبىلىم بەرۋ ءۇشىن وقۋشىلارعا زامان تالابىنا ساي ءبىلىم بەرۋ مازمۇنىن جاساۋ كەرەك. ورتا ءبىلىم بەرۋ ساپاسىن كوتەرۋدىڭ كونتسەپتسياسىنا وزگەرىستەر ەنگىزىلۋى كەرەك دەپ ەسەپتەيمىز»،—دەپ ءتۇسىندىردى التىنبەك نۇقۇلى.
View this post on Instagram
<
