لەوناردو دا ءۆينچيدىڭ ەڭ جۇمباق جانە قۇندى جاۋھارلارىنىڭ ءبىرى La Bella Principessa قازاقستان جۇرتشىلىعىنا ۇسىنىلادى. سۋرەت سفورتسيادا ۆارشاۆالىق كودەكسىنەن الىنعان جانە ميلان گەرتسوگى ليۋدوۆيكو يل مورونىڭ قىزى ءارى گەنەرال-كاپيتان گالەاتستسو سانسەۆەرينونىڭ جۇبايى بيانكا دجوۆاننا سفورتسانىڭ قىرىنان كورىنىسى دەپ تانىلعان. La Bella Principessa – شەبەردىڭ پەرگامەنتتەگى جالعىز تۋىندىسى بولىپ تابىلادى. بۇل بىرەگەي مۇمكىندىك استاناداعى يتاليا ەلشىلىگىنىڭ، ForteBank, Mastercard, Scripta Maneant جانە يتاليا مادەنيەت ينستيتۋتىنىڭ، سونداي-اق قازاقستان رەسپۋبليكاسى مادەنيەت جانە اقپارات مينيسترلىگىنىڭ قولداۋىمەن جۇزەگە استى. كورمە استاناداعى قازاقستان رەسپۋبليكاسىنىڭ ۇلتتىق مۋزەيىندە 7 ماۋسىم مەن 4 تامىز ارالىعىندا وتەدى.
La Bella Principessa — لەوناردو دا ءۆينچيدىڭ XV عاسىردىڭ اياعىندا سالعان تۋىندىسى، وندا يتالياندىق اقسۇيەكتەر وتباسىنان شىققان جاس قىزدىڭ پورترەتى بەينەلەنگەن. جوعالىپ، كەيىن قايتادان تابىلعان شىعارما شەبەردىڭ ەڭ جۇمباق جانە تاڭ قالدىراتىن تۋىندىلارىنىڭ ءبىرى بولىپ تابىلادى. بۇعان دەيىن كارتينا بۇكىل الەم بويىنشا بەس رەت قانا كورسەتىلىپ، ءار ۋاقىتتا سىنشىلار مەن كورەرمەندەردىڭ ۇلكەن قىزىعۋشىلىعىن تۋدىردى.
«لەوناردو - رەنەسسانس ادامىنىڭ بەينەسى، دارىن، دانىشپاندىق جانە شىعارماشىلىقتىڭ ماڭگىلىك وزەكتى نىشانى. سۋرەتشى جاۋھارلارىنىڭ ءبىرى استانادا كورمەلەنۋى - ەلدەرىمىز اراسىنداعى ىنتىماقتاستىقتى نىعايتۋدىڭ بىرەگەي مۇمكىندىگى»، - دەدى يتاليانىڭ قازاقستان رەسپۋبليكاسىنداعى ەلشىسى ماركو البەرتي.
عالىمدار، مۋزەيلەر جانە تەحنولوگيالىق زەرتتەۋ ينستيتۋتتارىمەن ۇزاق جىلدار بويى ىنتىماقتاسىپ قىزمەت ەتەتىن Scripta Maneant باسپاسى قازاقستانداعى يتاليا ەلشىلىگىمەن، يتاليا مادەنيەت ينستيتۋتىمەن، Forte Bank جانە Mastercard-پەن بىرلەسىپ، لەوناردونىڭ بۇل تۋىندىسىن استانا تورىندە كورمەگە ۇسىنعانىن ماقتان تۇتادى، ءارى كەلۋشىلەردىڭ رەنەسسانس ءداۋىرىنىڭ ورەسى بيىك ونەرىن تاماشالاپ، رۋحاني ءلاززات الۋىنا مۇمكىندىك بەرەدى.
«الەمدەگى باستى مادەني ءىس-شارالاردى قولداۋ Mastercard جۇمىسىنىڭ ماڭىزدى باعىتى بولىپ تابىلادى، وسىلايشا كومپانيا باعا جەتپەس ساتتەر جانە ايگىلى تۇلعالارمەن كەزدەسۋ مۇمكىندىگىن سىيلايدى، سونىڭ ىشىندە تانىمال ارتىستەر، مۋزىكانتتار جانە سۋرەتشىلەردىڭ شىعارماشىلىعىمەن تانىسۋدى دا اتاپ وتكەن ءجون. ءبىز بۇل جوبانى قۋانا قولدادىق جانە قازاقستاندىقتار لەوناردو دا ءۆينچيدىڭ تۋىندىسىمەن تانىسۋدان شىنايى راحات پەن باعا جەتپەس اسەر الاتىنىنا سەنىمدىمىز»، - دەپ اتاپ ءوتتى Mastercard كومپانياسىنىڭ قازاقستان مەن ورتالىق ازياداعى باس ديرەكتورى سانجار جامالوۆ.
«ForteBank» اق مادەنيەت پەن ونەردى جۇيەلى نەگىزدە قولدايدى. اتاپ ايتقاندا، بانك سوڭعى سەگىز جىل ىشىندە مادەني مۇرانى دامىتۋ، قولداۋ جانە وسكەلەڭ ۇرپاقتى تاربيەلەۋ ماقساتىندا «قۇلان-استانا» قب قىزمەتىن قارجىلاندىرىپ كەلەدى: وسى ۋاقىت ىشىندە 35-تەن استام كورمە ۇيىمداستىرىلدى، ونىڭ ىشىندە حالىقارالىق ماڭىزى زور جوبالار بار. گالەرەياعا كىرۋ تەگىن.
«ءبىزدىڭ ەلىمىزدە وسىنداي سيرەك كەزدەسەتىن جاۋھاردى كورۋ مۇمكىندىگى - قازاقستاننىڭ مادەني ءومىرى ءۇشىن ماڭىزدى وقيعا. ءبىز وعان قاتىسقانىمىزعا قۋانىشتىمىز. قالىڭ كورەرمەن لەوناردو دا ءۆينچيدىڭ وشپەس تۋىندىسىن كورگەن بويدا ەلەڭ ەتىپ، بەيجاي قالمايتىنىنا سەنىمدىمىن»، - دەدى «ForteBank» اق باسقارۋشى ديرەكتورى ءاليا ەسجان.
ۇيىمداستىرۋشىلار ەلوردانىڭ بارلىق قوناقتارى مەن تۇرعىندارىن لەوناردو دا ءۆينچيدىڭ ايگىلى شىعارماسىنىڭ اسەمدىگىن تاماشالاۋ ءۇشىن قازاقستان رەسپۋبليكاسىنىڭ ۇلتتىق مۋزەيىنە كەلۋگە شاقىرادى.
