قر پرەزيدەنتى اكىمشىلىگىنىڭ باسشىسى ايبەك دادەباەۆ رەسپۋبليكالىق تەلەارناعا بەرگەن سۇقباتىندا مەملەكەتتىك تىلگە قاتىستى سۇراققا جاۋاپ بەردى.
«وزدەرىڭىز بىلەسىزدەر، ەلىمىزدە كوپتەگەن ەتنوس وكىلدەرى تۇرادى. بۇعان سەبەپكەر بولعان تاريحي وقيعالاردى جاقسى بىلەسىزدەر. قازىر ءتىل ماسەلەسىن كۇردەلەندىرىپ، ءتىپتى ساياسي ويىنعا اينالدىرعىسى كەلەتىندەر دە بار. ماسەلەن، ەلىمىزدە تىلگە قاتىستى جۇرتتى داۋرىقتىرىپ، ۇلت بولاشاعىنا قاۋىپ توندىرەتىن ماسەلە تۋدىرىپ جۇرگەندەردى بايقايمىز. بۇل - ۇلتتىق قاۋىپسىزدىگىمىزگە كەرى اسەر ەتەتىن جايت. قاي تۇرعىدان قاراساق تا تىلدىك ماسەلە نازىك، اسا جاۋاپكەرشىلىكپەن كەلۋدى تالاپ ەتەدى»، - دەگەن پىكىرىن ءبىلدىردى ايبەك دادەباەۆ.
قر پرەزيدەنت اكىمشىلىگىنىڭ باسشىسى ءوز سۇقباتىندا ەلدە مەملەكەتتىك تىلگە، ونىڭ قولدانۋ اياسىنىڭ كەڭەيۋىنە ايرىقشا ءمان بەرىلەتىنىنە توقتالدى. ونىڭ ايتۋىنشا، بۇل – ەلىمىز بۇگىنگى تاڭدا جۇرگىزىپ وتىرعان اسا استارى تەرەڭ ساياسات.
«ناقتى فورمۋلاسى – كوپتىلدى قوعام، جالعىز مەملەكەتتىك ءتىلى بار ەل! ياعني، ونىڭ ماڭىزدى كومپونەنتى – تىلدىك توزىمدىلىك، جاڭاشا ايتساق، تىلدىك تولەرانتتىق. «جىلى-جىلى سويلەسەڭ...» دەگەن حالىق ناقىلى قاشاندا جادىمىزدا بولعانى ءجون. ەلدىڭ باياندى بولاشاعى دەگەن قاستەرلى ىستە قانداي ماسەلە بولسىن سابىرمەن، اقىلعا سالىپ شەشەتىن ءبىزدىڭ ەلدىڭ ازاماتتارى ءۇشىن بۇل قولدان كەلەتىن شارۋا. ءبىزدىڭ الدىڭعى بۋىننىڭ دا وسيەت ەتكەنى وسى. بىلە بىلسەك، تىلدىك توزىمدىلىك – قالا بەردى مەملەكەتتىك، ياعني ەلدىك قاۋىپسىزدىگىمىزدىڭ كەپىلى. داۋرىقپا ايقاي، ءدال قازىر نە قىلسا دا بولا سالسىن دەگەن تالاپ مۇلدەم بۇرىس ناتيجە اكەلۋى مۇمكىن!»، - دەپ سانايدى ايبەك دادەباەۆ.
قر پرەزيدەنتى اكىمشىلىگىنىڭ باسشىسى ا. دادەباەۆ مەملەكەتتىك ءتىلدىڭ قولدانىس اياسىنىڭ ودان ارى كەڭەيە بەرۋىن قامتاماسىز ەتەتىنىن جانە قازاق ءتىلى تۇبىندە ۇلتارالىق تىلگە اينالاتىنىن مالىمدەدى.
