باۋم توعايىنىڭ ەكولوگيالىق جاعدايىن باعالاۋ بويىنشا زەرتتەۋ جۇمىستارىنا قاتىسقان قازاق ۇلتتىق اگرارلىق ۋنيۆەرسيتەتىنىڭ پروفەسسورى بۇلقايىر مامبەتوۆ توعايدا وسەتىن اپاتتى اعاشتارعا سانيتارلىق كەسۋ قاجەت ەكەنى تۋرالى ايتىپ بەردى.
«ەكپەلەردى رەكوگنوستسيرلى ورمان-پاتولوگيالىق زەرتتەۋ ناتيجەسىندە بارلىق جەردە دەرلىك اعاشتار مەن بۇتالاردىڭ جاپىراق جەيتىن زيانكەستەرمەن زاقىمدالعانى انىقتالدى. بۇل زيانكەستەر جاپپاي كوبەيگەن كەزدە ونسىز دا السىرەگەن توعاي ەكپەلەرىنە ەلەۋلى زيان كەلتىرۋى ابدەن مۇمكىن»، - دەدى بۇلقايىر مامبەتوۆ.
ول اعىمداعى جىلى بەيىندى عىلىمي-زەرتتەۋ ينستيتۋتتارىنىڭ قىزمەتكەرلەرىن تارتا وتىرىپ، اپاتتى ءارى كەپكەن، قۋراعان، اۋرۋعا شالدىققان اعاشتاردى جوسپارلى ىرىكتەپ، سانيتارلىق كەسۋ جۇمىستارى باستالعانىن اتاپ ءوتتى. سونىمەن قاتار، ساندىك تۇرعىدان قۇندى قاتتى اعاش تۇرلەرى (ليپا، كاشتان، كاتالپا، اق اكاتسيا، ەمەن) ترانسپلانتاتسيالانادى. ساۋ اعاشتار ءۇشىن باۋم توعايىنداعى جۇمىس جوسپارلارى بويىنشا كۇتىم جۇمىستارى قاراستىرىلعان-توپىراق پەن وسىمدىكتەردىڭ جەر ءۇستى بولىگىنە كۇتىم جاساۋ (ازىقتاندىرۋ، سۋارۋ، قوپسىتۋ جانە ت.ب.).
باۋم توعايىنداعى اعاشتاردىڭ ورتاشا جاسى-100-140 جاس. توعاي اۋماعىندا اعاش جانە بۇتا وسىمدىكتەرىنىڭ بىرنەشە تۇرلەرى وسەدى، ولاردىڭ باسىم بولىگى ۇساق جاپىراقتى قاراعاش (Ulmus parvifolia), ءبۇدىرلى قاراعاش (Ulmus glabra), جاپىراقتى ۇيەڭكى (Aseg platanoides), ۇيەڭكى (Aseg negundo), جاپىراقتى ەمەن (Quercus robur), الاسا قايىڭ (Betula pendula), اق اكاتسيا (Robinia pseudoacacia), تەرەك (Populus).
