وبلىس اكىمى نۇرلىبەك نالىباەۆ شيەلى اۋدانىنا جاساعان جۇمىس ساپارى اياسىندا اقمايا، العاباس اۋىلىن كوگىلدىر وتىنعا قوسۋ سالتاناتتى شاراسىنا قاتىستى.
ايماق باسشىسى الدىمەن اقمايا ەلدى مەكەنى تۇرعىندارىن قۇتتىقتاپ، حالىقتىڭ تۇرمىسىنا قاجەتتى اۋىز سۋ، گاز تارتۋ، جول سالۋ ماسەلەلەرىنىڭ كەزەڭ-كەزەڭىمەن شەشىلەتىنىن تىلگە تيەك ەتتى.
- ەلدى مەكەندەردى كوگىلدىر وتىنمەن قامتاماسىز ەتۋ قارقىندى جۇزەگە اسىپ، اۋداننىڭ جاڭا تىنىسى اشىلىپ كەلەدى. سونىڭ دالەلى – بيىل شيەلى كەنتى 100 پايىز گازبەن قامتىلدى. جاقاەۆ، بيدايكول، بايسىن، ن.بەكەجانوۆ، قودامانوۆ ەلدى مەكەنىنىڭ تۇرعىندارى كوگىلدىر وتىن يگىلىگىن كورۋگە مۇمكىندىك الدى.
وسىنداي ناتيجەلى جۇمىستىڭ ارقاسىندا اۋدان حالقىنىڭ الەۋمەتتىك جاعدايى جاقسارىپ، تۇرمىسى تۇزەلۋدە. تابيعي گاز – تىرشىلىكتى جەڭىلدەتىپ قانا قويماي، قورشاعان ورتانى قورعاۋعا، ورمان قورىن ساقتاۋعا زور مۇمكىندىك بەرەدى. سوندىقتان يگىلىكتى ءىستىڭ ادامزات ءۇشىن پايداسى زور، - دەدى نۇرلىبەك نالىباەۆ.
بۇعان دەيىن اۋىل حالقى جىل سايىنعى ەسەپتى كەزدەسۋدە ەلدى مەكەنگە كوگىلدىر وتىن جۇرگىزۋدى ءجيى كوتەرىپ كەلگەن. بۇگىن اقمايا اۋىلىنداعى 500-گە جۋىق تۇرعىن ءۇي تابيعي گازبەن قامتاماسىز ەتىلدى. ايتا كەتەيىك، بۇل ماقساتقا رەسپۋبليكالىق، جەرگىلىكتى بيۋدجەتتەردەن 460 ملن.تەڭگە قارالعان.
ال، العاباس اۋىلىنداعى 600-گە جۋىق ءۇيدى تابيعي گازبەن قامتۋعا رەسپۋبليكالىق جانە جەرگىلىكتى بيۋدجەتتەن 488 ملن.تەڭگە بولىنگەن.
سالتاناتتى شاراعا قاتىسقان ءوڭىر باسشىسى اۋىل حالقىنىڭ ءومىر ءسۇرۋ دەڭگەيى قالالىقتارمەن تەڭەسكەنىن جەتكىزىپ، قۋانىشتارىنا ورتاقتاسىپ، اقجارما تىلەگىن جەتكىزدى.
ايتا كەتەيىك، الداعى ۋاقىتتا شيەلى اۋدانىنا قاراستى بەستام، دوسبول داتقا، ەڭبەكشى، جيدەلىارىق ەلدى مەكەندەرىنە گاز قۇبىرىن جۇرگىزۋگە قاجەتتى بيۋدجەتتىك ءوتىنىم تاپسىرىلسا، المالى، تاجىباەۆ ەلدى مەكەندەرىنە گاز قۇبىرىن جۇرگىزۋدىڭ جوبا-سمەتالىق قۇجاتتامالارى ازىرلەنىپ، ساراپتاماعا ۇسىنىلدى.
بيىل اۋىلدىق ەلدى مەكەندەردى گازداندىرۋ بويىنشا 13 جوبانى ىسكە اسىرۋ باستالسا، ونىڭ 7-ءۋى وسى جىلى اياقتالادى. ناتيجەسىندە، 15 مىڭنان استام حالقى بار 7 ەلدى مەكەن تابيعي گازعا قول جەتكىزىپ، ونى تۇتىناتىن حالىق سانىنىڭ ۇلەسى 68 پايىزعا جەتپەك. بۇگىندە شيەلى اۋدانىن تابيعي گازبەن قامتۋ ۇلەسى 56,4% قۇرايدى.
