10 sáýir kúni Almaty qalasyndaǵy QR Ulttyq kitaphanasynyń úlken májilis zalynda ardager fotojýrnalıst Qalıǵumar Qabdeshulynyń 85 jyldyq mereıtoıyna oraı daıyndalǵan «Búgingi fotosýret – erteńgi tarıh» atty fotokitaptyń tusaýkeseri ótti, dep habarlaıdy “Adyrna” ulttyq portaly photooner.kz saıtyna siltep.
Ardager fotojýrnalıstiń mereıtoıyna arnalǵan shara «Búgingi fotosýret – erteńgi tarıh» atty arnaıy uıymdastyrylǵan fotokórmeniń ashylýymen bastaldy.
Kórmeniń saltanatty ashylýynda sonaý Shyǵystan, ór Altaıdan, arnaıy kelgen Baýyrjan Qumarbekov halqymyzdyń «Aıhaı 25» atty ánin quıqyljyta oryndap, jıylǵan jurttyń kóńilin odan ári bir kóterip tastady.
Kórme kýratory Dáýren Maqsuthanuly alǵashqy sózdi «Nevada-Semeı» Halyqaralyq antııadrolyq qozǵalysynyń Vıe-prezıdenti, Eýrazııa Halyqaralyq ekonomıkalyq akademııasynyń jáne Qazaqstan Jýrnalıster akademııasynyń akademıgi, baspager Valerıı Aıtmuqashuly Jandáýletovke berdi.
Odan keıin sóz kezegin Qazaqstannyń eńbek sińirgen ártisi, Qazaqstan Respýblıkasynyń Memlekettik syılyǵynyń ıegeri, akter — Aıdos Bektemir alsa, Uıymdastyrýshylar atynan «Fotoóner» respýblıkalyq qoǵamdyq birlestiginiń Prezıdenti Asylhan Ábdiraıymuly sóz alyp, Qalıǵumar aǵanyń jartyǵasyrlyq shyǵarmashylyq kórmesi jaıly qysqasha aıta kelip, barlyq qonaqtardy kórmeni tamashalaýǵa shaqyrdy.
Kógildir tústi taspany Qalıǵumar aǵanyń mereıtoıyna arnaıy kelgen qurmetti qonaqtar: Nurmanbet Qızatuly, Saǵymbaı Qozybaev, Ulyqbek Esdáýlet, Valerıı Jandáýletovter birlese qıyp, fotokórmeni resmı ashty. Mereıtoı ıesiniń kelinderi men qyzdary arnaıy shashý shashty. Sodan soń, barlyq jınalǵandar fotokórmeni tamashalaýǵa múmkindik aldy.
«Búgingi jıyn, búgingi otyrys burynǵydan erekshe. Sebebi búgin KSRO jáne IýNESKO Halyqaralyq jýrnalıster uıymynyń múshesi, Respýblıkalyq, halyqaralyq fotokórmelerdiń júldegeri, fotojýrnalıst Qalıǵumar Qabdeshulynyń 85 jyldyq mereıtoıyn resmı túrde bastap otyrmyz» dep, kirispe sózin bastady da, ary qaraı, «Fotoóner» respýblıkalyq qoǵamdyq birlestiginiń qurmetti múshesi, ardager aqsaqalymyzdyń osy kúnin bizder asyǵa kúttik desek artyq aıtqandyq emes. Sebebi óz ǵumyrynyń elý jyldan astam ýaqytyn týǵan eline arnaǵan fotojýrnalıst Qalıǵumar Qabdeshuly kúlli qazaqqa ortaq tulǵa» dep, bir qaıyrdy moderator Asylhan Ábdiraıym.
Óz kezeginde Asylhan Ábdiraıym, Q.Qabdeshulyn Birlestiktiń atynan arnaıy Qurmet gramotasymen marapattap, ıyǵyna «Qazaqstan» atty shapan japty.
Moderator kelesi sózdi «Uly Dala» Respýblıkalyq qoǵamdyq birlestiginiń tóraǵasy, Halyqaralyq D.A.Qonaev qorynyń ókili, tarıhshy, qoǵam qaıtarkeri Ǵabıden Ádilbekuly Jákeıge berdi. Ǵabıden myrza Qalıǵumar aǵaǵa D.Qonaevtyń arnaıy tósbelgisi men «Ot Stalına do Gorbacheva» kitabyn syılady jáne Dáýrenmen osy ýaqytqa deıin birneshe iri jobalardy birge joǵary deńgeıde atqaryp júrgenderin aıta kele, ony Armııa generaly, elimizdiń tuńǵysh qorǵanys mınıstri Saǵadat Nurmaǵambetovtiń 100 jyldyǵyna arnalǵan mereıtoılyq tósbelgimen marapattady.
Odan keıin arnaıy kelgen qonaqtar mereıtoı ıesi Qalıǵumar Qabdeshulyn mereıtoıymen quttyqtady.
Halyqaralyq D.A.Qonaev qorynyń vıe-Prezıdenti, Álemdik Jazýshylar odaǵynyń qurmetti múshesi, Qazaqstan Respýblıkasynyń qurmetti azamaty, QR Ishki Ister organynyń ardageri, jeltoqsanshy Dáýletbek Janbotaev quttyqtaý sózin aıta kele, mereıtoı ıesiniń keýdesine Dinmuhamet Ahmetuly Qonaevtyń ordenin taǵyp, basyna qundyz bórik, ıyǵyna oqaly shapan japty.
Al, jýrnalıst, folklorshy, shejireshi-zertteýshi Asqar Igenuly Qalıǵumar aǵanyń 85 jas mereıtoıyna arnaý óleńin oqydy.
Odan keıin KSRO halyq ártisi, Memlekettik syılyqtardyń ıegeri, Qazaqstannyń Eńbek Eri, akter, rejısser Asanáli Áshimovtyń beınequttyqtaýyna kezek berildi.
Atalmysh kitaptyń eń mańyzdysy, osy kezge deıin «Qupııa sapar» degen grıfpen jarııalanbaı kelgen Antarktıdadaǵy «Ońtústik polıýste», ıaǵnı sondaǵy «Mırnyı» ǵylymı-zertteý stanııasynda túsirgen fotosýretteri tuńǵysh ret jarııalanyp otyr.
Qalıǵumar Qabdeshuly 1965 jyly Antarktıdada bolyp máńgi muzdy ólkeni sýretke túsirgen jáne 1983 jyly Halyqaralyq Jýrnalıster uıymynyń múshesi retinde Chehoslovakııada №000017 qyzmettik kýáligin alyp IýNESKO deńgeıinde moıyndalǵan alǵashqy qazaq fotografy retinde tarıhqa enip otyr.
Taǵy bir aıta keterligi, kitapqa fototilshiniń fotosýretteri alǵash ret janr-janrǵa jiktelip berildi.
Jınaq-kitap ǵylymı-ádistemelik qural retinde stýdentterge, izdenýshi magıstranttar men doktoranttarǵa jáne fotoónerdi qadirleıtin barsha ónersúıer qaýymǵa arnalǵan.
234 betten turatyn ǵumyrnamalyq fotokitap «Fotoóner» qoǵamdyq birlestiginiń jáne Qabdeshevter áýletiniń qoldaýymen «Daryn» baspasynan taralymy 500 danamen jaryq kórdi. Kitaptaǵy baǵa jetpes qundy fotosýretter Q.Qabdeshulynyń jeke arhıvinen alyndy.
