Өзбекстанның Аққорған ауданында 23 жастағы әйел күйеуі мен енесінің ұрып-соғуынан кейін ауруханада көз жұмды. Жәбірленуші ауыр соққыдан кейін комаға түсіп, барлық медициналық көмекке қарамастан, өмірін сақтап қалу мүмкін болмаған, деп хабарлайды "Адырна" ұлттық порталы.
Жергілікті БАҚ-тың мәліметінше, қайғылы оқиғаға байланысты әйелдің күйеуі процессуалдық тәртіпте қамауға алынған.
Бұл оқиға Өзбекстанда үлкен резонанс тудырып, қоғамда әйелдерге қатысты зорлық-зомбылық мәселесін қайта көтерді. Әлеуметтік желі қолданушылары кінәлілерді қатаң жазаға тартуды талап етуде.
Құқық қорғау органдары тергеу жұмыстарын жалғастыруда. Тергеу нәтижелері мен сот шешімі алдағы уақытта жарияланбақ.
