Premer-mınıstrdiń orynbasary – Ulttyq ekonomıka mınıstri Serik Jumanǵarın Májilistiń jalpy otyrysynan keıin ótken baspasóz máslıhatynda Magnum saýda jelisine qatysty boıkot máselesine pikir bildirdi, dep habarlaıdy "Adyrna" ulttyq portaly.
Áleýmettik jelide qazaqsha qyzmet kórsetýdi ótingeni úshin jetkizýshiniń jumystan qýylýyna baılanysty bastalǵan boıkot keń talqyǵa túsken edi. Jýrnalısterdiń suraǵyna jaýap bergen vıe-premer bul jaǵdaıdy jeke adamdar arasyndaǵy turmystyq daý dep atap, alaıda odan qoǵam úshin mańyzdy sabaq alynýy tıis ekenin aıtty.
"Bul – bar bolǵany jeke adamdar arasyndaǵy turmystyq daý. Biraq bul bizge úlken sabaq boldy. Ondaı til máselelerin, ulttyq máselelerdi talqylaǵanda, áleýmettik jelide jazǵanda abaı bolý kerek. Qarapaıym ǵana 20 mıllıon halqymyz bar. Tatý bolýymyz kerek. Qazaqtar aıtady ǵoı, "aýyly aralas, qoıy qoralas" bolý kerek. Bizge ne kerek? Qarapaıym, qaradomalaq qazaqtardyń basy aman bolsyn. Odan basqa eshteńe kerek emes", – dedi Serik Jumanǵarın.
Sonymen qatar, vıe-premer qazaqsha sóıleýdi talap etkeni úshin jumystan shyǵarylǵan azamattyń qazirgi tańda basqa jumysqa ornalasqanyn atap ótti.
"Meniń oıymsha, ol – sheshiletin másele", – dep qorytyndylady ol.
Eske sala keteıik, Magnum jelisiniń kýreri jumystan shyǵarylǵany jónindegi aqparat áleýmettik jelide qyzý talqyǵa tústi. Daý kýrerdiń tapsyrys berýshiden qazaq tilinde sóıleýdi talap etkeninen bastaldy. Keıin kompanııa ókilderi onyń jumystan shettetilgenin aıtty. Osy oqıǵadan keıin jeli qoldanýshylary Magnum dúkender jelisine qoǵamdyq boıkot jarııalady. Qazir áleýmettik jelige júktelip jatqan beınelerden tutynýshylardyń edáýir azaıǵanyn baıqaýǵa bolady.
