Májilis depýtaty Elnur Beısenbaev Magnum kompanııasyna qatysty áleýmettik jelilerde taraǵan jaǵdaıǵa baılanysty pikir bildirdi. Onyń aıtýynsha, bul jaǵdaıdy saıasılandyryp, tildik nemese ulttyq qaqtyǵys retinde kórsetýdiń qajeti joq.
"Birinshiden, manıpýlıaııaǵa jol berýge bolmaıdy. Men bul máseleni zerttedim, qaradym. Bul – tek Eńbek kodeksi aıasynda retteletin dúnıe. Bul – jumys berýshi men jumysshynyń qarym-qatynasy. Odan bir saıası, qoǵamdyq rezonans týdyryp, 'qazaq tili qorlanyp jatyr' degen áńgime emes. Bul – jeke bastyń daýy", – dedi depýtat.
Onyń aıtýynsha, jaǵdaıǵa qatysty naqty beınejazbalar joq, sondyqtan naqty ne aıtylǵanyn bilý múmkin emes.
"Sol sebepten, meniń oıymsha, Magnum da, qoǵamdaǵy kóp belsendiler de tek manıpýlıaııaǵa aldanyp otyrǵan sııaqty", – dedi ol.
Beısenbaev bul jaǵdaıdy saıasılandyrý arqyly kóptegen adam jumysynan aıyrylýy múmkin ekenin aıtty.
"Magnum – elimizdegi iri kásiporyndardyń biri. Qanshama qazaq jastary sol jerde jumys istep júr. Bul – eki qazaqtyń arasyndaǵy konflıkt. Odan daý týdyryp, 'qazaq tili qorlandy' dep aıtý – artyq", – dedi Májilis depýtaty.
Sóz sońynda Elnur Beısenbaev BAQ ókilderine de úndeý jasap, tekserilmegen, naqty deregi joq aqparatty taratpaýǵa shaqyrdy: "Baıaǵyda aıtatyn edi ǵoı: 'samaýrynnan sý ketti dese, Samarqandty sý aldy' degen. Sol áńgimeniń pushpaǵynda ketýdiń qajeti joq. Qoıý kerek ondaı nárseni", – dedi ol.
Depýtattyń aıtýynsha, bul másele Parlamentte nemese buqaralyq aqparat quraldarynda talqylaıtyn dúnıe emes.
