26 naýryzda Qazaqstan Prezıdenti Qasym-Jomart Toqaev «Uly Otan soǵysyndaǵy Jeńiske 80 jyl» biryńǵaı mereıtoılyq medali týraly» Jarlyqqa qol qoıdy, dep habarlaıdy "Adyrna" ulttyq portaly.
Atalǵan medalmen Uly Otan soǵysynyń ardagerleri, tyl eńbekkerleri jáne soǵys jyldarynda janqııarlyq eńbek etken azamattar marapattalady. Olardyń qataryna:
Uly Otan soǵysyna qatysqan áskerı qyzmetshiler, partızandar men astyrtyn top músheleri;
Soǵys jyldary jaraqat, kontýzııa nemese aýrý saldarynan múgedektik alǵan tulǵalar;
Qorshaýdaǵy Lenıngradta jumys istep, arnaıy marapattarǵa ıe bolǵan azamattar;
Fashıstik konlagerler men gettoda bolǵan kámeletke tolmaǵan tutqyndar;
Soǵys kezinde qajyrly eńbek etkeni úshin Keńes Odaǵynyń ordenderi men medaldarymen marapattalǵan nemese keminde alty aı jumys istegen azamattar;
Soǵysta qaza tapqan jaýyngerlerdiń qaıta nekege turmaǵan jesirleri kiredi.
Mereıtoılyq medal ardagerler men soǵys jyldarynda eren eńbek etken azamattardyń eńbegin qurmetteýge baǵyttalǵan.
