Qyrǵyzstanda elektrondy temekige tyıym salyndy. Tıisti zańǵa el prezıdenti Sadyr Japarov qol qoıdy, dep habarlaıdy "Adyrna" ulttyq portaly.
Tyıym 2025 jyldyń 1 shildesinde kúshine enedi. Osy kúnnen bastap Qyrǵyzstanǵa quramynda nıkotın suıyqtyǵy bar elektrondy temekini ákelýge, sondaı-aq olardy el aýmaǵynda satýǵa nemese paıdalanýǵa tyıym salynady.
"Bastama azamattardyń densaýlyǵyn jańa býyndaǵy temeki ónimderiniń teris áserinen qorǵaýǵa baǵyttalǵan", – delingen resmı habarlamada.
Zańǵa sáıkes, tyıymdy buzǵandarǵa aýyr aıyppuldar salynady. Jeke tulǵalarǵa elektrondyq temekini paıdalanǵany úshin 100 eseptik kórsetkish, olardy satqany úshin – 200 eseptik kórsetkish kóleminde aıyppul tańaıyndalady. Al zańdy tulǵalar úshin aıyppul 600 jáne 650 eseptik kórsetkish mólsherinde.
Elektrondy temekilerdi zańsyz ákelý de qylmystyq jaýapkershilikke jatady. Eleýli kólemde ákelgen jaǵdaıda, bir jylǵa deıin túzetý jumystaryna nemese 1000–1200 EK kóleminde aıyppulǵa tartylady. Kóp mólsherde ákelý jaǵdaıynda aıyppul 2000 EK deıin ósip, eki jylǵa deıin bas bostandyǵynan aıyrý jazasy beriledi.
Qazaqstanda veıpterge tyıym 2024 jyldyń 20 maýsymynan bastap tyıym salynǵan. "Qazaqstan Respýblıkasynyń keıbir zańnamalyq aktilerine densaýlyq saqtaý máseleleri boıynsha ózgerister men tolyqtyrýlar engizý týraly" zańǵa prezıdent Qasym-Jomart Toqaev 2024 jylǵy 19 sáýirde qol qoıǵan edi.
