Prezıdent Djo Baıden ákimshiligi Ýkraınaǵa Reseı aýmaǵyn ATACMS zymyranymen atqylaýǵa ruqsat berdi. Bul týraly 17 qarashada The New York Times jazdy, dep habarlaıdy «Adyrna» tilshisi.
Sheteldik BAQ-tyń málimetinshe, taktıkalyq qarý bastapqyda Kýrsk aımaǵyndaǵy Reseı jáne Soltústik Koreıa áskerlerine qarsy qoldanylýy múmkin. Degenmen, sheneýnikter Baıden Ýkraına qarýly kúshterine qarýdy basqa jerde qoldanýǵa ruqsat berýi múmkin dep sanaıdy.
«Ýkraına bul zymyrandardy Reseı men Soltústik Koreıa áskerleriniń shoǵyrlanǵan aımaqtaryna, áskerı tehnıkasyna, logıstıkalyq túıinderine, oq-dári qoımalaryna jáne jabdyqtaý jelilerine soqqy jasaý úshin paıdalana alady. Bul Reseı men Soltústik Koreıa kúshteriniń shabýylyn báseńdetýge kómektesedi»,—delingen aqparatta.
Al Reuters derekkózderi Kıev amerıkalyq qarýymen aldaǵy sanaýly kúnde shabýyl jasamaq degen aqparat taratty.
Aq úı ázirge bul málimetterge eshqandaı málimdeme jasaǵan joq.
Aıta keteıik, ATACMS ballıstıkalyq zymyrandary 300 shaqyrymǵa deıingi qashyqtyqtaǵy nysandardy dál kózdeýge qabiletti.
Buǵan deıin jańa saılanǵan prezıdent Donald Tramp Baıdendi Ýkraınaǵa kórsetken qoldaýy úshin aıyptaǵan edi.
