Qaraǵandy oblysynda "Taza Qazaqstan" respýblıkalyq ekologııalyq akııasy jalǵasýda. "Bólý! Tapsyrý! Qaıta óńdeý!" bastamasy aıasynda óńirdiń 3 myńnan astam oqýshysy tanymdyq dáristerge qatysyp, qoqysty durys suryptaýdy úırendi.
Búgin Qaraǵandydaǵy № 93 Shákárim Qudaıberdıev atyndaǵy gımnazııa oqýshylaryna qaldyqtardy suryptaý boıynsha tanymdyq ınteraktıvti sabaq ótti.
Oqýshylarǵa qaldyqtardy durys suryptaý jáne qaıta óńdeý tabıǵı resýrstardy saqtaýǵa kómektesetini túsindirildi. Olar plastıka týraly kóptegen jańa derekterdi bildi. Mysaly, plastıkalyq bótelke shamamen 500 jyl boıy shireıdi. Barlyq qatysýshylar syılyqtar aldy.
Osyǵan uqsas sabaqtar bir ýaqytta taǵy 4 qalalyq mektepte ótti. Olarǵa 200-den astam oqýshy qatysty.
Sonymen qatar, Qaraǵandyda "Ekobatyr"ekologııalyq baıqaýy uıymdastyryldy. 33 mekteptiń oqýshylary ártúrli atalymdar boıynsha kóshbasshy ataǵy úshin baq synasty. "Instagram-daǵy eń belsendi komanda"sııaqty qosymsha marapattar da bar.
– Baıqaýdyń negizgi maqsaty-balalar men jasóspirimderge qaldyqtardy suryptaý daǵdylaryn úıretý. Makýlatýra men plastıkalyq bótelkelerdi jınaýǵa baýlý. Baıqaý eki baǵytqa bólingen: "Makýlatýrany jına-Aǵashty saqta!"jáne" Plastıkti qaıta óńdeý – planetaǵa aýa qajet!». Qaraǵandydan birinshi synyptan jetinshi synypqa deıingi oqýshylardan quralǵan mektep komandalary qatysty, – dedi oblystyq tabıǵı resýrstar jáne tabıǵatty paıdalanýdy retteý basqarmasynyń basshysy Baqtııar Sanbaev.
Komandalar barlyǵy 3573,52 keli makýlatýra men 540,75 keli plastıkalyq bótelke tapsyrdy.
Oqýshylar jınaǵan qaldyqtardy qaıta óńdeýge tapsyrdy. Jeńimpazdar dıplomdar men baǵaly syılyqtarǵa ıe bolady. Qazir baıqaý qorytyndylanyp, jeńimpazdar anyqtalatyn bolady.
Baıqaýdyń uıymdastyrýshysy – Qaraǵandy oblysynyń Tabıǵı resýrstar jáne tabıǵatty paıdalanýdy retteý basqarmasy, seriktesteri – Qaraǵandy qalasynyń bilim bólimi jáne "VtorSyre Karaganda"JShS.
