Fýtboldy damytý máseleleri talqylanǵan jıynda oblys ákimi Ermaǵanbet Bólekpaev «Shahter» klýbynyń basqarý modelin synǵa aldy. Sońǵy kezde komandanyń sporttyq jetistikteri kóńil kónshitpeıdi. Qazirgi maýsym qorytyndysy boıynsha «Shahter» tizimde sońǵy orynda, ıaǵnı Premer-lıgadan shyǵyp, Birinshi lıga deńgeıine túsýge – basty úmitker.
– Bul – óńirlik fýtbol saıasatynda júıeli túrde oryn alǵan olqylyqtardyń nátıjesi. Ókinishke qaraı, klýbtyń uzaq merzimdi damytý mejesi, marketıngtik strategııasy joq, – dedi aımaq basshysy. – Fýtbolshylardyń irikteý júıesi syn kótermeıdi. 25 fýtbolshynyń 12-si – legıoner. Jalpy alǵanda, klýb sheteldik legıonerlerdi qoldaý qoryna aınaldy. Turaqty qarjylyq model jasalmaǵan.
Tyǵyryqtan shyǵý joly retinde Ermaǵanbet Bólekpaev birqatar shuǵyl jáne strategııalyq sharalardy qabyldaý qajettigin málimdedi. Onyń ishinde basqarý tásilder men kadrlyq quramdy qaıta qaraý – kezek kúttirmeıtin másele. Bir aıdyń ishinde klýbtyń strategııasyn ázirleý kerek, onyń aıasynda fýtbol ınfraqurylymyn damytý josparyn eskerý qajet.
Sondaı-aq, oblys ákimi balalar men jasóspirimder fýtbolyn damytý, otandyq mamandardy daıarlaýǵa qatysty tapsyrmalar berdi.
Birinshiden, óńirlik DSK-lar negizinde «Shahter» fýtbol klýbynyń fılıaldaryn ashý qajet. Bul klýb akademııasyna irikteý úshin selekııalyq júıe qurýǵa múmkindik beredi. Ekinshiden, jergilikti jas daryndarǵa jol ashý maqsatynda kelesi jyly balalar men jasóspirimder komandalary arasynda fýtbol týrnırin uıymdastyrýdy tapsyrdy.
– Memleket basshysy kásibı jáne buqaralyq sportty damytý boıynsha birqatar mindetterdi aıqyndap berdi. Osyǵan baılanysty joǵary bilikti mamandardy daıarlaý qajet. Oblysta balalar men jasóspirimder fýtbolyn damytý boıynsha fýtbol ortalyǵy men akademııanyń jumysyn kúsheıtý qajet. Balalar jattyqtyrýshylaryn oqytýdy, onyń ishinde olardy shetelde oqytý múmkindikterin qarastyrý kerek, – dep atap ótti Ermaǵanbet Bólekpaev.
Naqty sporttyq meje – «Shahter» kelesi maýsymda-Premer-lıga quramyna oralýy kerek.
Jıyn barysynda Ermaǵanbet Bólekpaev fýtbol men sportty damytýdyń jalpy jospary týraly aıtyp berdi. Máselen, Qaraǵandyda sporttyq klaster qurylyp, onyń aıasynda ÝEFA standarttaryna sáıkes zamanaýı stadıon, jyl boıy jattyǵýǵa bolatyn fýtbol manejin salý josparlanýda. Ol úshin qala aýmaǵynda 67 gektar jer qarastyrylǵan. Budan basqa, kelesi jyly qaladaǵy Ortalyq stadıon jańartylady.
