Qazaq tilindegi balalar kontentin damytýǵa bıýdjetten qoldaý kórsetiledi, dep habarlaıdy «Adyrna» ulttyq portaly. Bul týraly Májilis depýtaty Ashat Aımaǵambetov aıtty.
Depýtat qazaq tilindegi mýltfılmder óte az, al YouTube sııaqty qoljetimdi platformalarda múlde joqtyń qasy ekenin atap ótti.
«Qazaq tilindegi mýltfılmder óte az, al YouTube sııaqty qoljetimdi platformalarda múlde joqtyń qasy. Búgingi kúni bul úlken másele, óıtkeni balalar teledıdardan góri ınternet pen YouTube-ty kóbirek tańdaıdy. Balalar “Sınıı traktor” men “Masha ı Medved” sııaqty mýltfılmdermen shektelmeı, sapaly ári qyzyqty qazaqsha mýltfılmderdi kórýi tıis.Osy maqsatta, kelesi jyldyń bıýdjet jobasyn qarastyrý barysynda, qazaq tilindegi mýltfılmder jasaýǵa 350 mıllıon teńge bólýdi jáne olardyń tek teledıdarǵa emes, mindetti túrde ınternetke, sonyń ishinde YouTube-qa júktelýin qamtamasyz etetin normany zańǵa engizdik. Bul balalardyń qazaq tilinde qyzyqty kontentke qol jetkizý múmkindigin keńeıtedi dep senemiz» - dep jazdy depýtat.
Sonymen qatar, qazaqsha balalar kontentin jasaýda belgili bir qıyndyqtar bar ekenin de alǵa tartty.
«Máselen, “Balapan” telearnasynyń kontent jasaýshylarǵa tóleıtin qarajaty óte az bolǵandyqtan, olar tek qazaq tilin qoldaý maqsatynda jumys istep, kóbine volonter sııaqty áreket etedi. Sondyqtan, osy bıýdjet arqyly bólingen qosymsha qarajat qazaqsha kontenttiń sapasyn arttyrýǵa yqpal etedi dep senemiz» - dedi Ashat Aımaǵanbetov.
Balalar arasynda qazaqsha kontentti tutyný boıynsha zertteý júrgizý týraly
Ǵylym mınıstrligine usynys jasaldy. Aldaǵy ýaqytta álemdik hıt mýltfılmderdi memlekettik tilge aýdaryp, YouTube-qa júkteý úshin avtorlyq quqyq ıelerimen baılanysý josparlanýda.
