Facebook áleýmettik jelisi arqyly mektep dırektorynyń jemqorlyqty belshesinen basyp otyrǵanyn aıtyp, basshy bolýǵa laıyqty emes dep jazba jarııalaǵan áıel sot aldynda jaýap berdi, dep habarlaıdy «Adyrna» tilshisi otyrar.kz-ke silteme jasap.
Túlkibas aýdandyq sotynda jala jabý babynda kózdelgen ákimshilik quqyq buzýshylyq isi qaraldy. Sot otyrysynda quqyq buzýshy óz kinásin moıyndap, istegen áreketi úshin keshirim suraǵan.
Jábirlenýshi mektep dırektory ákimshilik hattamada kórsetilgen ýájdi tolyq qoldaǵan. Iaǵnı Facebook jelisi arqyly jarııalaǵan málimetter ar-namysy men qadir qasıetine nuqsan keltiretindigin, ol málimetter shyndyqqa janaspaıtynyn aıtyp, quqyq buzýshyny ákimshilik jaýapkershilikke tartýdy surady.
Sot qaýlysymen quqyq buzýshy Ákimshilik quqyq buzýshylyq týraly kodekstiń 73-3 baby 2-bóligimen kináli dep tanylyp, oǵan 465 192 teńge ákimshilik aıyppul salyndy.
«Sot quqyq buzýshynyń shyn nıetpen ókinish bildirýin, jábirlenýshi men sottan keshirim suraýyn, jas otbasy ekenin, júktiligin eskerdi. ÁQBtK-niń 829-11-baby 2-bóligine sáıkes, salynatyn ákimshilik aıyppul somasyn 30%-ǵa qysqartqan. Negizi atalǵan bapta kózdelgen aıyppul mólsheri 180 AEK, ıaǵnı 664 560 teńgeni quraıdy»,-delingen oblystyq sot málimetinde.
