Jetisaıdaǵy «Kúlparshyn» ortalyq bazarynan 580 júk kóligimen 3150 tonna qoqys shyǵaryldy. Jekemenshik bazar órt qaldyqtarynan tazartyldy. Bazardy qalpyna keltirý jumystary eki aýysymda, táýlik boıy júrgizildi. Túrkistan oblysynyń ákimi Darhan Satybaldyǵa Jetisaı bazarynyń búgingi jaǵdaıy baıandaldy. Oblys ákimi naqty tapsyrmalar berdi. Atalǵan oqys oqıǵa qaıtalanbaýy úshin aýdan, qalalardaǵy barlyq bazarlardyń talapqa saı jumys isteýin qadaǵalap, qaýipsizdik sharalaryn tekserýdi tapsyrdy.
Órtengen bazardyń jańa jobasy jasaldy. Saýda núkteleri qolaıly ári qaýipsiz etip salynady. Ony tezdetip iske qosý úshin nysan aýmaǵy 6 sektorǵa bólinip, ár sektorda Jetisaıǵa jaqyn ornalasqan Maqtaaral, Saryaǵash, Keles, Shardara, Jetisaı jáne Qazyǵurt aýdandarynyń qurylysshylary jumys isteıdi. Bazardyń ınfraqurylymy jaqsaryp, joly jóndeledi
– Halyqtyń múddesin qorǵaý – birinshi másele. Sondyqtan órtten zardap shekken kásipkerlerge kómek kórsetýdi tezdetý kerek. Jeńildetilgen nesıe berýdi sheship, bankke qaryzy barlardy qoldaý qajet. Qaryzdy qaıtarý merzimin shegerý boıynsha jumys kúsheıtilsin, – dedi Darhan Satybaldy.
Órtengen nysan janyndaǵy jumysy toqtaǵan bazardy iske qosý boıynsha jumystar júrgizilip jatyr. Kásipkerler qalaýy boıynsha sonda kóshiriledi.
Bazarǵa órt qaýipsizdigi boıynsha mamyr aıynda tekserý júrgizilip, birneshe kemshilik anyqtalyp, eskertý jasalǵan. Órt qaýipsizdigine baılanysty talaptar saqtalmaǵan. Oqys oqıǵaǵa baılanysty polıııa tarapynan tergeý júrip jatyr. Órt-tehnıkalyq saraptama, sot qurylys saraptamasy júrgizildi. Shuǵyl tergeý toby qurylǵan.
Órtten 600-den astam saýdager zardap shegip, myńnan astam saýda núktesi japa shekken. Keltirilgen shyǵyndardy óteý boıynsha arnaıy qor quryldy.
