Қызылжарда ұйытқыған боран соғып әрі жердің беті қатып, тұрғындар әбден әбігерленді. Қазірде өңірдің күре жолын тазалауға 23 техника шықты, 19-ы тротуарлардағы қарды күреп жатыр. Үш көлік көктайғаққа қарсы ұнтақ шашуда, деп хабарлайды "Адырна" ұлттық порталы.
4 қарашадан бері тоқтаусыз жауған қар соңы боранға ұласты. Көктайғақ болып, жолда оннан астам көлік апаты тіркелді.
Қазір Петропавл көшелерінде қар тазалау жұмыстары қарқынды жүргізіліп жатыр. Жауған қардың қалыңдығы, шамамен, 7 мм.
- Өкінішке қарай, қолайсыз ауа райына байланысты бір күнде қалада 14 жол-көлік оқиғасы орын алды. Құрбандар мен зардап шеккендер жоқ. Қазір ауа райы бұзылып, көше көктайғақ болып жатыр. Сондықтан қала тұрғындарынан жолда мұқият әрі абай болуды сұраймын, - деді Петропавл қаласының әкімі Руслан Янбаев.СҚО ПД мәліметтері бойынша, таңғы сағат 8-ден бастап ЖКО бойынша бес өтініш келіп түскен, жол апаты туралы хабарламалар әлі де келіп жатыр.
"Адырна" ұлттық порталы
Related news
