Ақтөбе облысында 8 адам қаза тапқан жантүршігерлік апат орнында фото мен видеолар пайда болды, деп хабарлайды “Адырна” ұлттық порталы Tengrinews.kz сайтына сілтеп.
Айта кетсек, 7 тамызда Самара-Шымкент тас жолының 862-ші шақырымында (Хромтау ауданы) жол апаты болып, жүк көлігі мен микроавтобус соқтығысқан.
Ауыр жүк көлігімен соқтығысқан минивэнде 8 адам болған: үш ер адам және бес бала. Барлық жолаушылар мен жүргізуші оқиға орнында қаза тапты. Көлікте әкесімен бірге екі ұл – ағайындылар болған.
Білім басқармасының хабарлауынша, 7 тамыз күні таңертең Toyota Ipsum көлігі Әйтеке би ауданынан Маңғыстау облысына бет алған. Балалар футбол турниріне қатысуы керек еді.
«Біздің мәлімет бойынша, балалар ата-аналарының рұқсатымен, тіпті кейбіреулері ата-аналарымен бірге Маңғыстау облысына 2013 жылы туған оқушылао арасында футболдан өтетін турнирге жолға шыққан. Бұл туралы бізге ресми ақпарат түскен жоқ. Ресми рұқсат, келісім жоқ», - деді ол бұған дейін Ақтөбе облысының білім басқармасының басшысы Жайық Сұлтан.
Полицияның мәліметінше, жүк көлігінің жүргізушісі зардап шекпеген, қазір түсініктеме беріп жатыр. Апаттың себептері анықталуда.
