Су тақырыбындағы мақал-мәтелдердің көбі күнделікті өмірде айтыла бермейді. Осынау қанатты сөздердің астары өмірден алынғаны белгілі. Оған дәлел – соңғы аптадағы су тасқыны. «Қыста – арбасын, жазда шанасын дайындау» үрдісі үзілген жерден проблема басталады. Төмендегі мақал-мәтел топтамасының да өз айтары бар.
⋆⋆⋆
Алыстан үрген ит қаппас, төменнен төрге су ақпас.
⋆⋆⋆
Алпыс күн тасыған су алты күнде қайтар.
⋆⋆⋆
Ағын су жолын табады, ақ адам оңын табады.
⋆⋆⋆
Ақылы аздың ашуы көп, таяз судың тасуы көп.
⋆⋆⋆
Атаң мұрап болса да атыздан кетпе.
⋆⋆⋆
Астауына қарай – қауғасы.
⋆⋆⋆
Бай – байға құяды, сай – сайға құяды.
⋆⋆⋆
Бұлаққа бұлақ қосылса, егізбіз дейді,
Көлге көл қосылса, теңізбіз дейді.
⋆⋆⋆
Бір кісі қазған құдықтан мың кісі су ішеді.
⋆⋆⋆
Дария толы су болса, ит тілімен су ішер.
⋆⋆⋆
Еділ ел болып келгенге су болады, едірейіп келгенге у болады.
⋆⋆⋆
Етігіңді шешпей суға түспе.
⋆⋆⋆
Жайдақ су жай ағады.
⋆⋆⋆
Жақсы мұраптың соңынан су ереді, жаман мұраптың соңынан шу ереді.
⋆⋆⋆
Жаман сайдың суы тасыса, өткел бермес.
⋆⋆⋆
Жаман сайға су түссе, өткел бермес кешуге,
Жаман кісіге мал бітсе, сусын бермес ішуге.
⋆⋆⋆
Жатқан тастың астына су бармайды.
⋆⋆⋆
Жеті күн жауған жаңбырдан желіп өткен су артық
⋆⋆⋆
Жер тегіс болса, су сылдырап ақпас еді.
⋆⋆⋆
Жемес жерде ет бар, ішпес жерде су бар.
⋆⋆⋆
Жылай - жылай арық қазсаң, күле - күле су ішерсің.
⋆⋆⋆
Иыққа шақ иінағаш.
⋆⋆⋆
Көл көлге құяды, сел селге құяды — шұқанаққа дым да жоқ.
⋆⋆⋆
Қар суының тасқынын қасқалдақ көрмес.
⋆⋆⋆
Қылышты қынап сақтайды, суды мұрап сақтайды.
⋆⋆⋆
От — арық, су — семіз.
⋆⋆⋆
Өзен ақса — көл, дария ақса — сел.
⋆⋆⋆
Өзен суын жаңбыр тасытады, адам қадірін еңбек асыртады.
⋆⋆⋆
Өлмеген құл алтын аяқпен су ішер.
⋆⋆⋆
Өткелсіз өзен – асусыз кезең.
⋆⋆⋆
Өткелін білмей өзенге түспе.
⋆⋆⋆
Тауды, тасты су бұзады, азаматты сөз бұзады.
⋆⋆⋆
Сай қуалап су ағар, жел қуалап от жанар.
⋆⋆⋆
Сасық суға аша бұтақ бітеді.
⋆⋆⋆
Саяз су сарқырап ағады.
⋆⋆⋆
Сең жүредi көктемде астан-кестең,
Ақ атанның бауырын арқан кескен.
⋆⋆⋆
Су байлық – алты айлық, қар байлық – үш айлық.
⋆⋆⋆
Су аяғы – құрдым.
⋆⋆⋆
Су басынан бұзылады.
⋆⋆⋆
Су тасыса – жар құлайды, көп толқыса – хан құлайды.
⋆⋆⋆
Су патшасы – мұрап, түн патшасы – шырақ.
⋆⋆⋆
Суға түспей, теңіз кешпейсің.
⋆⋆⋆
Суға кеткен жаңқаға жармасады.
⋆⋆⋆
Судың кепкені - тіршіліктің кеткені.
⋆⋆⋆
Сылдырсыз аққан судан без.
⋆⋆⋆
Су бергеннің сауабы бар, су төккеннің жауабы бар.
⋆⋆⋆
Су кетсе, тас қалады, сүрме кетсе, қас қалады.
⋆⋆⋆
Су қатайса мұз болар.
⋆⋆⋆
Су ішер арығы жоқ елдің сүзіп алар балығы жоқ.
⋆⋆⋆
Судың жолын құм бөгер, ердің жолын сұм бөгер.
⋆⋆⋆
Судың терең-саязын ағысынан білерсің,
Аттың жақсы, жаманын шабысынан білерсің.
⋆⋆⋆
Судың түбін шым бекітеді, сөздің түбін шын бекітеді.
⋆⋆⋆
Таста тамыр жоқ, суда қаймақ жоқ.
⋆⋆⋆
Терең судың ағысы білінбес.
⋆⋆⋆
«Тесіксің» деп елек шелекке күледі.
⋆⋆⋆
Халқын ойламаған хан семіз, дүние оған – су, теңіз.
«Адырна» ұлттық порталы
