Мәдениет және спорт вице-министрі Ғабидолла Әбдірахымов «Kazakh Tourism» ұлттық компаниясының директорлар кеңесінің төрағасы болып сайланды, деп хабарлайды «Адырна» тілшісі.
26 ақпан «Kazakh Tourism» ҰК АҚ директорлар кеңесінің отырысы өтті. Кеңестің күн тәртібіндегі басты мәселелердің бірі ұлттық компанияның директорлар кеңесінің жаңа төрағасын тағайындау болды.
Отырысқа қатысушылар Ғабидолла Абдрахымовтың кандидатурасына дауыс берді.
Кеңестегі сөзінде Әбдірахымов туризм саласының әртүрлі жобаларына инвестиция тарту керектігін атап өтті.
«Салалық мемлекеттік бағдарламаны сәтті жүзеге асыру мақсатында өңірлермен бірлесе отырып, 22 мың қазақстандықты жұмыспен қамту үшін туризм саласының әртүрлі жобаларына 1,1 трлн жеке және мемлекеттік инвестиция тарту керек»,-деді ол.
«Адырна» ұлттық порталы
