كوكتەم كەلگەن سايىن ەلىمىزدە سۋ تاسقىنى قاۋپى كۇشەيە تۇسەتىنى بەلگىلى. وسىعان بايلانىستى كوكشەتاۋ قالاسى اكىمدىگى وتكەن جىلعى جاعدايلاردى ەسكەرە وتىرىپ، الدىن الۋ جۇمىستارىن كۇشەيتتى. كەشەندى شارالاردى قولعا الدى. بۇل تۋرالى بريفينگ بارىسىندا قالا اكىمىنىڭ ورىنباسارى اقجول قىلىشباەۆ ءمالىم ەتتى، دەپ حابارلايدى وڭىرلىك كوممۋنيكاتسيالار قىزمەتىنەن.
كوكشەتاۋ قالاسىنىڭ اۋماعىندا قىلشاقتى مەن قوپا كولى ورنالاسقان، ال كراسنىي يار اۋىلدىق وكرۋگىنەن شاعالالى وزەنى اعىپ وتەدى. بۇل – سۋ تاسقىنى قاۋپى جوعارى ايماقتار. وسى رەتتە قالا اكىمدىگى ينجەنەرلىك جۇمىستاردى جۇيەلى تۇردە جۇرگىزۋدە.
«قىس بويى قالا كوشەلەرىنەن 200 مىڭنان استام تەكشە مەتر قار شىعارىلدى. سۋ باسۋ قاۋپىن ازايتۋ ماقساتىندا ارىق جۇيەلەرى، سۋ وتكىزۋ كانالدارى، وزەن ارنالارى تازارتىلدى. سونىمەن قاتار، بيىل العاش رەت قىسقى سەنبىلىك ۇيىمداستىرىلىپ، 16 000 تەكشە مەتردەن استام قار سىرتقا تاسىمالداندى. قالا اۋماعىندا 6 كم استام سۋ بۇرۋ ارىقتارى تەرەڭدەتىلىپ، 6,4 كم ارىق-كانال جۇيەسى قالپىنا كەلتىرىلدى. 53 سۋ وتكىزۋ قۇبىرى اۋىستىرىلىپ، نوسەرلى كارىز جۇيەلەرى ىستىق سۋمەن تازارتىلدى» ، دەدى سپيكەر.
سۋ تاسقىنىن بولدىرماۋ ءۇشىن قوپا كولى مەن قىلشاقتى وزەنى قۇيىلاتىن جەردە مۇز جارۋ جۇمىستارى باستالىپ كەتتى. بۇل وزەندەگى سۋ دەڭگەيىن رەتتەپ، كوكتەمگى سۋ تاسقىنىنىڭ الدىن الۋ ءۇشىن ماڭىزدى قادام.
«كوكشەتاۋدا سۋ تاسقىنىنا قارسى كۇرەسكە 62 تەحنيكا بىرلىگى، 25 جۇمىسشى، 17 ارنايى تەحنيكا مەن 18 موتوپومپا جۇمىلدىرىلعان. قوسىمشا 9 موتوپومپا ساتىپ الىنىپ، تاعى 8-ءىن الۋ جوسپارلانۋدا. سونداي-اق، قالا قويمالارىندا 10 000 قاپ، 20 000 توننا ينەرتتى ماتەريال، جانارماي قورى ساقتالعان. قاۋىپتى ايماقتارعا 4 150 قاپ توسەلدى، 14 مەكەنجاي بويىنشا سۋ باسۋدىڭ الدىن الۋ جۇمىستارى جۇرگىزىلدى»
قالا اكىمىنىڭ ورىنباسارىنىڭ ايتۋىنشا، توتەنشە جاعداي ورىن العان جاعدايدا «ترانسپورتنيك» ساياجاي تۇرعىندارى قاۋىپسىز ايماققا كوشىرىلەدى. سونىمەن قاتار، مال ەۆاكۋاتسياسى مەن جەم-ءشوپ قورىن ساقتاۋ جوسپارى ازىرلەنگەن.
«كوكشەتاۋداعى سۋ تاسقىنى كەزەڭى تولىق باقىلاۋدا. بارلىق قاۋىپ-قاتەر ەسكەرىلىپ، ءتيىستى شارالار قابىلدانىپ جاتىر. تۇرعىنداردان كەز كەلگەن توتەنشە جاعداي كەزىندە جەدەل شتابقا حابارلاسۋ سۇرالادى»، دەپ قورىتىندىلادى ول.
