АҚШ Қорғаныс министрі Пит Хегсет Мексиканың әскери басшыларымен телефон арқылы сөйлесіп, елдегі наркокартельдер мәселесін шешпесе, Вашингтон біржақты әскери әрекеттерге баратынын ескертті, деп хабарлайды "Адырна" ұлттық порталы.
The Wall Street Journal хабарлауынша, 31 қаңтарда өткен бұл келіссөз – Пентагонның жаңа басшысының Мексика әскери басшылығымен алғашқы ресми диалогы болды. Хегсеттің мәлімдемесі Мексика билігін дүр сілкіндірді, олар АҚШ ел аумағына басып кіруі мүмкін деп қауіптеніп отыр.
"Егер Мексика үкіметі картельдермен жасырын байланысын тоқтатпаса және бұл мәселені өз бетінше шешпесе, АҚШ әскері біржақты қадамдарға барады," – деген Хегсеттің сөзі Мексика басшылығын ашуландырғанын жазды The Wall Street Journal.
Мексика тарапы бұл мәлімдемені соғыс жариялау туралы ескерту ретінде қабылдап, оны егемендікке төнген қауіп деп атады. Ел үкіметі АҚШ-тан нақты түсініктеме талап етпек.
Бұл жағдай АҚШ пен Мексика арасындағы дипломатиялық шиеленісті күшейтуі мүмкін, ал Вашингтонның нақты қандай әрекетке баратыны әзірге белгісіз.
