Павлодарда балабақшадағы бассыздыққа қатысты қылмыстық іс қозғалды, деп хабарлайды “Адырна” ұлттық порталы.
«Мұғалімнің кәмелетке толмағандарды тәрбиелеудегі міндеттерін орындамауы бойынша қылмыстық іс қозғалды. Қажетті сараптамалар тағайындалды, оның қорытындысы бойынша процессуалдық шешім қабылданады», - деп хабарлады сәрсенбіде Павлодар полиция департаментінен.
Қалалық білім басқармасы қызметтік тексеріс басталғанын атап өтті.
Толық мән-жай анықталғанша тәрбиелеуші қызметкер жұмыстан шеттетілді.
Павлодардағы №16 балабақша тәрбиеленушілерінің ата-аналары әлеуметтік желіде 2024 жылдың 3 және 4 маусымындағы бейнежазбаларда мұғалімдердің бірінің «балалардың басынан табақпен ұрғанын байқағанын» айтты. Бұл топта бір жастан екі жасқа дейінгі балалар тәрбиеленеді. Кейінірек басқа ата-аналар да бейнекамералардағы бейнені көргісі келген, бірақ менеджер оларға мұндай мүмкіндік бермей, полицияға хабарласқан.
