Венгрияның бұрынғы премьер-министрі Виктор Орбан Петер Мадьяр басқаратын жаңа үкіметке қарсы саяси күреске қайта оралатынын мәлімдеді. Бұл туралы РИА Новости жазды, деп хабарлайды «Адырна» тілшісі.
«Біз сабыр сақтадық. Тіпті қажет болғаннан да артық төзім таныттық. Олардың әрекеттерін ескерсек, әділдік те көрсеттік. Бес ай өтті. Бұл кезең аяқталды. Болды, енді тоқтау керек. Бұлай жалғаса алмайды. Ұлттық қарсылық көрсету уақыты келді. Сабырдың да, біржақты ымыраның да шегі бар. Енді күреске шығатын кез жетті», – деді Орбан Кетче қаласында өткен саяси маусымның ашылуында сөйлеген сөзінде.
Экс-премьердің айтуынша, Венгриядағы оңшыл күштер елдің егемендігін сақтап қалуды көздейді, ал «Тиса» партиясының үкіметі мемлекетті Еуроодақтың отарына айналдырмақ.
«Отарлаушының аты – Брюссель. Олар («Тиса» партиясы – ред.) біз үлкен еңбекпен қайтадан ұлттық бақылауға қайтарған венгр экономикасын – энергетика секторын, банк жүйесін, телекоммуникация саласын шетелдіктердің қолына бермек. Ақша елден сыртқа кетеді. Олар венгриялық ірі компанияларды әлсіретіп, шетелдік инвесторларға өткізеді», – деп ескертті Орбан.
Билікке келгеннен кейін Венгрия премьер-министрі Петер Мадьяр Ресеймен прагматикалық қарым-қатынасты сақтауға ниетті екенін мәлімдеген болатын. Ол әсіресе республика үшін энергия тасымалдаушыларын жеткізу саласындағы ынтымақтастықтың маңызын атап өтті. Соған қарамастан, оның еуропашыл саяси бағыты Ресейге қарсы санкцияларға жиі қарсы шыққан және Мәскеумен тығыз экономикалық байланыстарды қолдаған Виктор Орбанның саясатынан ерекшеленеді.
