13 шілдеде Моңғолияның Хүй долоон худаг жерінде Біріккен Ұлттар Ұйымы бекіткен Дүниежүзілік жылқы күніне арналған алғашқы халықаралық салтанатты іс-шара өтті.
Іс-шараның ашылуында Моңғолия президенті Ухнаагийн Хүрэлсүх сөз сөйлеп, жылқының адамзат өркениеті мен көшпелі мәдениеттің дамуындағы ерекше орнына тоқталды.
Президенттің айтуынша, моңғол халқының тарихы мен мәдениеті жылқымен тығыз байланысты. Ол моңғол жылқысын ұлттық мұраның ажырамас бөлігі әрі мемлекеттіліктің маңызды символы ретінде бағалады.
Мемлекет басшысы қазіргі таңда әлемде 60 миллионнан астам жылқы бар екенін, оның 5 миллионнан астамы Моңғолияда өсірілетінін айтты. Сондай-ақ Моңғолия жылқы саны бойынша әлемде төртінші, ал жан басына шаққандағы көрсеткіш бойынша бірінші орында тұрғанын атап өтті.
Ухнаагийн Хүрэлсүхтің сөзінше, Дүниежүзілік жылқы күнін белгілеу туралы бастама жылқыға қатысты мәдени мұраны сақтау, зерттеу, дамыту және халықаралық деңгейде насихаттау мақсатында көтерілген. Бұл бастаманы БҰҰ Бас Ассамблеясы қолдап, енді мереке жыл сайын Наадам ұлттық мерекесі аясында аталып өтетін болады.
Президент Дүниежүзілік жылқы күні жылқы шаруашылығының экономикалық және әлеуметтік маңызын арттыруға, ғылыми зерттеулерді дамытуға, мәдени мұраны сақтауға және халықаралық ынтымақтастықты нығайтуға ықпал ететінін айтты.
Ол сондай-ақ моңғол халқының жылқы мәдениетінің маңызды бөлігі саналатын жүйрік ат жарысына тоқталып, оның Наадам мерекесінің ажырамас бөлігі әрі адамзаттың материалдық емес мәдени мұрасының құрамына енетін дәстүр екенін атап өтті.
Дүниежүзілік жылқы күні аясында алғаш рет Моңғолия президентінің жүлдесіне арналған халықаралық ат жарысы ұйымдастырылды. Сонымен қатар, елдің әр өңірінен келген салт аттылардың қатысуымен салтанатты шеру өтті.
Сөз соңында Моңғолия президенті Дүниежүзілік жылқы күнінің әлем елдері арасындағы мәдени байланыстарды нығайтуға, жылқы мұрасын сақтау мен дәріптеуге ықпал ететініне сенім білдіріп, жылқыны адамзаттың сенімді серігі ретінде қастерлейтін барлық халықты мерекемен құттықтады.
